អ្នកនាំពាក្យការបរទេស ចិន ឆ្លើយយ៉ាងខ្លីរឿងលោក ហ៊ូ ជីនតាវ ត្រូវបណ្ដើរ​ចេញពីសមាជបក្ស

អ្នកនាំពាក្យក្រសួងការបរទេសចិនបានបញ្ចៀសការស្រាយបំភ្លឺពីអ្វីដែលបានកើតឡើងចំពោះអតីតមេដឹកនាំលោក ហ៊ូ ជីនតាវ នៅពេលដែលលោកត្រូវបានគេបណ្ដើរចេញពីសមាជជាតិរបស់បក្សកុម្មុយនិស្តកាលពីថ្ងៃសៅរ៍ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅពេលត្រូវបានគេសួរនាំអំពីលោក ហ៊ូ នៅក្នុងសន្និសីទសារព័ត៌មានកាលពីថ្ងៃចន្ទ អ្នកនាំពាក្យក្រសួងការបរទេសចិន លោក Wang Wenbin បាននិយាយយ៉ាងខ្លីថា “អ្នកឆ្លើយឆ្លងព័ត៌មានរបស់ទីភ្នាក់ងារសារព័ត៌មាន Xinhua បានរាយការណ៍ព័ត៌មានពាក់ព័ន្ធទាំងអស់​នេះរួចហើយ” ។

ទីភ្នាក់ងារ Xinhua បានបង្ហោះនៅលើគណនី Twitter ជាភាសាអង់គ្លេសកាលពីថ្ងៃសៅរ៍ថា លោក ហ៊ូ បានចូលរួមក្នុងសម័យប្រជុំបិទនៃសមាជជាតិលើកទី ២០ របស់គណបក្ស ទោះបីជាគាត់ទើបតែជាសះស្បើយពីជំងឺនាពេលថ្មីៗនេះក៏ដោយ” ។

Xinhua បានចុះផ្សាយទៀតថា “ក្រោយមកលោក ហ៊ូ ត្រូវបានបណ្ដើរចេញពីសាលប្រជុំយ៉ាងលឿន បន្ទាប់ពីលោកមានអារម្មណ៍មិនស្រួលខ្លួន ហើយអង្គរក្ស ២ នាក់បាននាំលោកទៅបន្ទប់មួយនៅក្បែរកន្លែងប្រជុំដើម្បីឲ្យលោកសម្រាក ខណៈរហូតមកដល់ពេលនេះលោក ហ៊ូ មានសុខភាពប្រសើរជាងមុនហើយ” ។

គួរបញ្ជាក់ថា លោក ហ៊ូ ជីនតាវ វ័យ ៧៩ ឆ្នាំគឺជាស្នងតំណែងមុនរបស់លោក ស៊ី ជីនពីង បានអង្គុយនៅខាងឆ្វេងដៃរបស់លោក ស៊ី នៅក្នុងព្រឹត្តិការណ៍បិទបញ្ចប់សមាជគណបក្សកុម្មុយនិស្តចិនកាលពីថ្ងៃសៅរ៍ ដែលបានប្រារព្ធឡើងជារៀងរាល់ ៥ ឆ្នាំម្ដង ខណៈលោក ស៊ី បានជាប់ឆ្នោតជាអគ្គលេខាធិការបក្សកុម្មុយនិស្តសម្រាប់អាណត្តិទី ៣ ក្នុងរយៈពេល ៥ ឆ្នាំទៀត ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ដឹងមូលហេតុដែលលោក ហ៊ូ ជីនតាវ ចេញពីសមាជបក្សកុម្មុយនិស្ត ចិន