អ្នកវិទ្យាសាស្ត្រ ពន្យល់មូលហេតុ ដែលសត្វចៀម ក្នុងកសិដ្ឋានចិន ដើរជារង្វង់ឥតឈប់ រយៈពេល១២ថ្ងៃ

អ្នកវិទ្យាសាស្ត្រម្នាក់បានផ្តល់ការពន្យល់ សម្រាប់បាតុភូតដ៏ចម្លែកមួយ ដែលសត្វចៀមរាប់រយក្បាល ត្រូវបានគេឃើញដើរជារង្វង់ឥតឈប់រយៈពេល១២ថ្ងៃ ក្នុងកសិដ្ឋានមួយកន្លែងនៅប្រទេសចិន។

លោក Matt Bell សាស្ត្រាចារ្យ និងជានាយកនៃនាយកដ្ឋានកសិកម្ម នៃសាកលវិទ្យាល័យ Hartpury ក្នុងចក្រភពអង់គ្លេស បាននិយាយថា សត្វដែលបង្ហាញនៅក្នុងវីដេអូនោះ អាចមានភាពតានតឹងទាក់ទងទៅនឹងការខ្លាចទីចង្អៀតបិទជិត។

លោកបានប្រាប់សារព័ត៌មាន Newsweek ថា “វាហាក់ដូចជាថា សត្វចៀមទាំងនោះ ត្រូវបានគេបង្ខាំងនៅក្នុងទ្រុងយូរពេក ហើយនេះអាចនាំឲ្យមានអាកប្បកិរិយាប្រែប្រួល ជាមួយនឹងការដើរជារង្វង់ឥតឈប់”។

ទោះបីជាយ៉ាងណាក៏ដោយ ទ្រឹស្ដីមួយចំនួនទៀត បានបង្ហាញថា សត្វទាំងនេះអាចទទួលរងពីជំងឺបាក់តេរី ហៅថា Listeriosis។ ជំងឺ​អាច​បង្កឲ្យ​មាន​អាកប្បកិរិយា​ច្របូកច្របល់ និងស្ទាក់ស្ទើរ។

វីដេអូនេះ ត្រូវបានបង្ហោះដំបូងនៅលើ Twitter ដោយកាសែត People’s Daily។ ប្រព័ន្ធផ្សព្វផ្សាយ​របស់​រដ្ឋ​ចិន ​បាន​ហៅ​បាតុភូត​នេះ​ថា​ជា “អាថ៌កំបាំង​ចៀម​ដ៏​អស្ចារ្យ”។ វីដេអូ​នេះ​ត្រូវ​បាន​ថត​នៅ​ក្នុង​ខេត្តមួយនៃតំបន់​ម៉ុងហ្គោលី៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ RT

ចុចអាន៖ ឆេះរោងចក្រនៅ ចិន ស្លាប់មនុស្ស ៣៨នាក់ (មានវីដេអូ)