តើ ក្រដាស ស តំណាងឲ្យអ្វី ក្នុងបាតុកម្មដ៏កម្រ នៅ ចិន?

ប្រទេសចិន កំពុងឈានចូលដល់ថ្ងៃទីបួននៃការតវ៉ាដ៏កម្រ និងរីករាលដាល។ បាតុកម្ម​នេះ ​ត្រូវ​បាន​គេ​ស្គាល់​ថា​ជា “ការ​តវ៉ា​ក្រដាស ​ស” ដោយ​សារ​ពលរដ្ឋ​កាន់​ក្រដាស ស ទំហំ A4 ​ផ្គើនទៅ​នឹង​អាជ្ញាធរ​រដ្ឋាភិបាល។

ចាប់តាំង​ពី​ថ្ងៃ​សុក្រ​មក ការ​តវ៉ា​បាន​ផ្ទុះ​ឡើងនៅ​ក្នុង​ប្រទេស​ចិន ​ប្រឆាំង​នឹង​វិធានការ​រឹត​បន្តឹង​ជំងឺ​កូវីដ-១៩ ដែល​អូសបន្លាយ​ជា​យូរ​មក​ហើយ។

ចាប់តាំងពីផ្ទុះជំងឺរាតត្បាត ប្រទេសចិនបានដាក់ចេញនូវគោលនយោបាយ “សូន្យកូវីដ” ដោយបានអនុវត្តគោលនយោបាយបិទខ្ទប់យ៉ាងតឹងរ៉ឹង សូម្បីតែនៅក្នុងតំបន់ដែលមានការឆ្លងត្រឹមមួយករណីក៏ដោយ។ ការដាក់កំហិតទាំងនេះ អាចមានរយៈពេលច្រើនខែ ដោយមនុស្សមិនអាចចាកចេញពីផ្ទះរបស់ពួកគេបានឡើយ។

ទោះបីជាមានការរឹតបន្តឹងអស់រយៈពេលជាច្រើនឆ្នាំមកហើយក៏ដោយ ពេលនេះ ប្រជាពលរដ្ឋចិនបាននាំគ្នាចេញតវ៉ាតាមដងផ្លូវ ដោយសារតែអគ្គិភ័យបានឆាបឆេះអគារផ្ទះល្វែងមួយ ក្នុងទីក្រុង Urumqi កាលពីថ្ងៃព្រហស្បតិ៍សប្តាហ៍មុន។

មនុស្ស១០នាក់បានស្លាប់នៅក្នុងអគ្គិភ័យនោះ ហើយគេគិតថា វិធានការទប់ស្កាត់ជំងឺរាតត្បាតនៅពេលមានអគ្គិភ័យ បានរារាំងមិនឲ្យអ្នករស់នៅក្នុងអគារផ្ទះល្វែង អាចគេចចេញពីអគ្គិភ័យបាន។

ដូច្នេះ តើក្រដាស ស តំណាងឲ្យអ្វី?

នៅក្នុងការតវ៉ា ពលរដ្ឋ​ចិន​បាន​កាន់​ក្រដាស ស ទំហំ A4 ដើម្បីបង្ហាញពីកំហឹងរបស់ពួកគេប្រឆាំងអាជ្ញាធរចិន និងវិធានការបិទខ្ទប់ដ៏តឹងរ៉ឹង។ អ្នកតវ៉ាម្នាក់បានឲ្យដឹងថា “ក្រដាស ស គឺតំណាងឲ្យអ្វីគ្រប់យ៉ាងដែលយើងចង់និយាយ ប៉ុន្តែមិនអាចនិយាយបាន”៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Fast Company

ចុចអាន៖ រថយន្តដឹកអ្នកទៅធ្វើចត្តាឡីស័កកូវីដ ក្រឡាប់តាមផ្លូវ ស្លាប់មនុស្ស ២៧នាក់នៅ ចិន