ថៃ បន្តរកឃើញការឆ្លងកូវីដ៣៦៥ករណីនិងស្លាប់០១នាក់ទៀត

មជ្ឈមណ្ឌលគ្រប់គ្រងស្ថានភាពជំងឺកូវីដ១៩ (CCSA) បានរាយការណ៍ពីករណីឆ្លងថ្មីចំនួន៣៦៥ករណីនៅថ្ងៃពុធនេះនិងមានអ្នកស្លាប់ម្នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យ CCSA លោកវេជ្ជបណ្ឌិត Taweesin Visanuyothin បាននិយាយថា អ្នកបើកបរភេទប្រុសអាយុ៦៣ឆ្នាំម្នាក់ដែលបានដឹកពលករចំណាកស្រុកនៅខេត្ត សាមុតសាខន បានស្លាប់។ រោគសញ្ញារបស់គាត់បានវិវត្តកាលពីថ្ងៃទី២៧ខែធ្នូដោយមានគ្រុនក្តៅខ្លាំង ក្អកនិងហៀរសំបោរ។ អ្នកជំងឺត្រូវបានបញ្ជូនទៅកាន់មន្ទីរពេទ្យបន្ទាប់ពីអុកស៊ីហ្សែននៅក្នុងឈាមរបស់គាត់បានធ្លាក់ចុះរហូតដល់៧៦ភាគរយហើយគាត់ត្រូវបានគេធ្វើរោគវិនិច្ឆ័យឃើញថាមានជំងឺរលាកសួត។

ក្នុងអំឡុងពេលព្យាបាល តម្រងនោមរបស់គាត់ត្រូវបានគេរកឃើញថាខូច។ គាត់បានស្លាប់កាលពីរសៀលថ្ងៃទី៥ខែមករាបន្ទាប់ពីមានបញ្ហាដកដង្ហើមនិងសរីរាង្គជាច្រើនលែងដំណើរ។

គួរបញ្ជាក់ថា គិតត្រឹមម៉ោង១:៥០នាទីរសៀលថ្ងៃពុធនេះ ប្រទេសថៃបានកត់ត្រាករណីឆ្លងកូវីដសរុប៩,៣៣១ករណី ស្លាប់៦៦នាក់និងជាសះស្បើយ៤,៤១៨នាក់៕

ប្រែសម្រួលដោយ៖ Vann Vann

ប្រភព៖ The Nation