G7 ប្តេជ្ញាបន្តជួយ អ៊ុយក្រែន និងរៀបចំផ្តល់ប្រព័ន្ធការពារដែនអាកាស (មានវីដេអូ)

ក្រុមប្រទេសមហាអំណាចសេដ្ឋកិច្ចទាំងប្រាំពីរ (G7) នៅថ្ងៃអង្គារទី១៣ខែធ្នូនេះ បានសន្យាបន្តជួយអ៊ុយក្រែនការពារខ្លួន ប្រឆាំងនឹងការវាយលុករបស់រុស្ស៊ី។ មេដឹកនាំ G7 ត្រូវបានចូលរួមដោយប្រធានាធិបតីអ៊ុយក្រែនលោក Volodymyr Zelensky តាមរយៈ videolink ក្នុងអំឡុងពេលកិច្ចប្រជុំនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសេចក្តីថ្លែងការណ៍រួមមួយ ដែលចេញដោយរដ្ឋាភិបាលចក្រភពអង់គ្លេស, មេដឹកនាំ G7 បានរិះគន់ខ្លាំងៗចំពោះវោហាសាស្ត្រនុយក្លេអ៊ែរគ្មានទំនួលខុសត្រូវរបស់ទីក្រុងមូស្គូ ហើយបាននិយាយថា ប្រសិនបើរុស្ស៊ី ហ៊ានប្រើប្រាស់អាវុធគីមី ជីវសាស្ត្រ ឬនុយក្លេអ៊ែរមែននោះ រុស្ស៊ីនឹងត្រូវជួបប្រទះនូវផលវិបាកធ្ងន់ធ្ងរ។

ស្របពេលជាមួយគ្នានោះ មេដឹកនាំ G7 បានសង្កត់ធ្ងន់លើសារសំខាន់ នៃការផ្តល់ខែលការពារដែនអាកាសទៅឲ្យអ៊ុយក្រែន។

មេដឹកនាំ G7 និយាយថា “យើងនឹងបន្តសម្របសម្រួលកិច្ចខិតខំប្រឹងប្រែង ដើម្បីបំពេញតម្រូវការបន្ទាន់របស់អ៊ុយក្រែនសម្រាប់ឧបករណ៍យោធា និងការពារ ដោយផ្តោតភ្លាមៗលើការផ្តល់ប្រព័ន្ធការពារដែនអាកាសដល់អ៊ុយក្រែន”។

ទន្ទឹមនោះ ក្នុងអំឡុងសុន្ទរកថាតាមវីដេអូ លោក Zelensky បានអំពាវនាវដល់មេដឹកនាំ G7 សុំឲ្យបញ្ជូនអាវុធបន្ថែមទៀតដូចជារថក្រោះ កាំភ្លើងធំ គ្រាប់រ៉ុកកែត និងកាំជ្រួចរយៈចម្ងាយឆ្ងាយជាដើម។

គួរបញ្ជាក់ថា អ៊ុយក្រែនបាននិងកំពុងជំរុញឲ្យដៃគូលោកខាងលិចរបស់ខ្លួន ផ្តល់ប្រព័ន្ធសព្វាវុធទំនើបៗ ចំពេលមានការវាយប្រហារដោយមីស៊ីលរបស់រុស្ស៊ី លើហេដ្ឋារចនាសម្ព័ន្ធសំខាន់ៗ និងស៊ីវិល។

កាលពីខែតុលា ទីក្រុង កៀវ បានទទួលប្រព័ន្ធការពារដែនអាកាស Iris-T លើកដំបូងពីប្រទេសអាល្លឺម៉ង់ ខណៈប្រព័ន្ធមីស៊ីលបាញ់ពីដី​ទៅ​អាកាស​កម្រិត​ខ្ពស់​ NASAMS និងប្រព័ន្ធការពារអាកាស Apside បានមកដល់ប្រទេសនេះក្នុងខែវិច្ឆិកា៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ DW

ចុចអាន៖ ពូទីន ព្រមានថា ប្រទេសណាបាញ់នុយក្លេអ៊ែរដាក់រុស្ស៊ី ប្រទេសនោះនឹងភ្លក់ អាវុធល្បឿនលឿនជាងសំឡេង ហើយបាត់មុខពីផែនដី