សារបុណ្យណូអែល! សម្តេចប៉ាប ជំរុញឲ្យបញ្ចប់ សង្គ្រាមអ៊ុយក្រែន 

នៅក្នុងសារបុណ្យណូអែលតាមប្រពៃណី សម្តេចប៉ាប Francis បានអំពាវនាវឲ្យបញ្ចប់សង្រ្គាម “ដែលគ្មានន័យ” នៅអ៊ុយក្រែន និងជម្លោះផ្សេងទៀត ហើយអំពាវនាវឲ្យបញ្ចប់ការប្រើប្រាស់អាហារ ជាអាវុធនៃសង្រ្គាម។

ក្នុងសារបុណ្យណូអែលលើកទី១០ ទៅកាន់ទីក្រុងនិងពិភពលោកកាលពីថ្ងៃអាទិត្យទី២៥ខែធ្នូ ប្រមុខនៃសាសនាចក្ររ៉ូម៉ាំងកាតូលិកអង្គនេះ ក៏បានជំរុញផងដែរ ឲ្យមនុស្សមើលឲ្យបានវែងឆ្ងាយ និងជួយជនអនាថា ជនអន្តោប្រវេសន៍ ជនភៀសខ្លួន និងជនក្រីក្រ ដែលស្វែងរកការលួងលោម ភាពកក់ក្តៅ និងអាហារ។

ពីវិមាន​ Basilica Saint Peter នៅបុរីវ៉ាទីកង់, សម្តេចប៉ាបលើកឡើងថា “អនុញ្ញាតឲ្យយើងមើលឃើញមុខមាត់របស់កុមារទាំងអស់ នៅគ្រប់ទីកន្លែងក្នុងពិភពលោក ដែលចង់បានសន្តិភាព”។

សម្តេចប៉ាប Francis បានប្រាប់ប្រជាជនរាប់ម៉ឺននាក់ថា “សូមឲ្យយើងបានឃើញមុខមាត់របស់បងប្អូនជនជាតិអ៊ុយក្រែនរបស់យើងផងដែរ ដែលកំពុងជួបប្រទះបុណ្យណូអែលនេះ ក្នុងភាពងងឹត និងត្រជាក់ នៅឆ្ងាយពីផ្ទះរបស់ពួកគេ ដោយសារការបំផ្លិចបំផ្លាញដែលបណ្តាលមកពីសង្រ្គាមរយៈពេល១០ខែ។ សូមព្រះជាម្ចាស់ បំផុសគំនិតយើងឲ្យផ្តល់នូវកាយវិការជាក់ស្តែងនៃសាមគ្គីភាព ដើម្បីជួយដល់អស់អ្នកដែលរងទុក្ខ ហើយសូមឲ្យទ្រង់បំភ្លឺគំនិតនៃអ្នកដែលមានអំណាច ដើម្បីបំបិទសំឡេងផ្គរលាន់នៃអាវុធ ហើយបញ្ចប់សង្រ្គាមដែលឥតន័យនេះ!”។

គួរបញ្ជាក់ថា សាររបស់សម្តេចប៉ាប បានចេញប៉ុន្មានម៉ោង បន្ទាប់ពីការវាយឆ្មក់តាមអាកាស និងស៊ីរ៉ែនលានទ្រហឹង ពេញប្រទេសអ៊ុយក្រែន និងមួយថ្ងៃ បន្ទាប់ពីមន្ត្រីអ៊ុយក្រែននិយាយថា ការវាយប្រហាររបស់រុស្ស៊ីលើទីក្រុង Kherson ដែលទើបរំដោះបាន បានសម្លាប់មនុស្សយ៉ាងតិច១០នាក់ និងរាប់សិបនាក់រងរបួស៕

ប្រែសម្រួល៖ Vann Vann

ប្រភព៖ Aljazeera

ចុចអាន៖ សម្តេចប៉ាប Francis ចាប់ផ្តើមដំណើរទស្សនកិច្ចប្រថុយគ្រោះថ្នាក់បំផុតនៅបរទេស