លោក គីម ជុងអ៊ុន បង្ហាញគោលដៅយោធាថ្មី (មានវីដេអូ) 

ប្រព័ន្ធផ្សព្វផ្សាយរដ្ឋបានរាយការណ៍នៅថ្ងៃពុធទី២៨ខែធ្នូនេះថា មេដឹកនាំកូរ៉េខាងជើងលោក គីម ជុងអ៊ុន បានបង្ហាញគោលដៅថ្មីឆ្នាំ២០២៣ សម្រាប់យោធារបស់ខ្លួន នៅក្នុងកិច្ចប្រជុំគណបក្សកម្មករដែលកំពុងកាន់អំណាច។

របាយការណ៍និយាយថា នៅថ្ងៃទីពីរនៃកិច្ចប្រជុំពេញអង្គលើកទី៦របស់គណៈកម្មាធិការមជ្ឈិមទី៨របស់បក្ស លោក គីម បានពិនិត្យឡើងវិញនូវស្ថានភាពប្រឈមដែលកើតឡើងថ្មីៗ នៅលើឧបទ្វីបកូរ៉េ និងទិដ្ឋភាពនយោបាយទូលំទូលាយ។

មេដឹកនាំជំនាន់ទី៣រូបនេះ​ បានកំណត់ទិសដៅសម្រាប់ការតស៊ូប្រឆាំងសត្រូវ និងគោលដៅសម្រាប់ការពង្រឹងអំណាចការពារជាតិ។

យោងតាមទីភ្នាក់ងារព័ត៌មានផ្លូវការ KCNA លោក គីម បានបញ្ជាក់ពីគោលការណ៍នៃកិច្ចការបរទេស និងទិសដៅនៃការតស៊ូប្រឆាំងនឹងសត្រូវ ដែលគណបក្ស និងរដ្ឋាភិបាលកូរ៉េខាងជើងត្រូវតែគោរពឲ្យបានហ្មត់ចត់ ដើម្បីការពារសិទ្ធិអធិបតេយ្យ និងការពារផលប្រយោជន៍ជាតិ។

ទោះបីជា KCNA មិនបានផ្តល់ព័ត៌មានលម្អិតអំពីគោលដៅទាំងនោះក៏ដោយ ប៉ុន្តែគេដឹងច្បាស់ណាស់ថា ការកត់សម្គាល់របស់លោក គីម អាចបង្ហាញថា ប្រទេសឯកោមួយនេះ នឹងបន្តពន្លឿនការកសាងយោធារបស់ខ្លួន។

ប្រទេសកូរ៉េខាងជើង បានបាញ់មីស៊ីលជាច្រើនគ្រាប់ ក្នុងកម្រិតដែលមិនធ្លាប់មានសោះក្នុងឆ្នាំនេះ ហើយការបាញ់បង្ហោះជាច្រើនលើក ត្រូវបានធ្វើឡើងដើម្បីបង្កើតអាវុធយុទ្ធសាស្ត្រ ក្រោមផែនការរយៈពេលប្រាំឆ្នាំ ដែលដាក់ចេញនៅក្នុងសមាជបក្សពលករកាលពីដើមឆ្នាំ២០២១។

គួរបញ្ជាក់ថា ភាពតានតឹងនៅតែមានកម្រិតខ្ពស់ពេញមួយឆ្នាំនេះ ចំពេលមានការសាកល្បងអាវុធឥតឈប់ឈរដោយកូរ៉េខាងជើង ហើយស្ថានការណ៍បានឡើងកម្តៅម្តងទៀតក្នុងសប្តាហ៍នេះ បន្ទាប់ពីយន្តហោះគ្មានមនុស្សបើករបស់កូរ៉េខាងជើងចំនួន៥គ្រឿង បានឆ្លងចូលទៅក្នុងប្រទេសកូរ៉េខាងត្បូង ដែលជំរុញឲ្យទីក្រុងសេអ៊ូល បញ្ជូនយន្តហោះចម្បាំង និងឧទ្ធម្ភាគចក្រវាយប្រហារទៅស្ទាក់ ហើយព្យាយាមបាញ់ទម្លាក់ពួកគេ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ CNA

ចុចអាន៖ គីម ជុងអ៊ុន បង្ហាញមុខកូនស្រីម្តងទៀត ជាមួយការប្តេជ្ញា បង្កើតកម្លាំងនុយក្លេអ៊ែរមានឥទ្ធិពលបំផុតលើ ពិភពលោក