Hacker រុស្ស៊ី បង្ហាញព័ត៌មានមន្ត្រី ណាតូ ជាង ១០០ នាក់កំពុងជួយប្រយុទ្ធ​ឲ្យ អ៊ុយក្រែន តាមអ៊ីនធឺណិត

សមាជិកក្រុម Hacker រុស្ស៊ី RaHDit បានផ្សព្វផ្សាយព័ត៌មាននៅលើគេហទំព័ររបស់ខ្លួន NemeZida ថា មន្ត្រីណាតូជាង ១០០ នាក់កំពុងជួយប្រយុទ្ធឲ្យអ៊ុយក្រែនប្រឆាំងនឹងរុស្ស៊ីនៅក្នុងពិភពអ៊ីនធឺណិត ។

Hacker ក្រុម RaHDit និយាយថា សមាជិកណាតូទាំងអស់ គឺជាអ្នកដែលនៅពីក្រោយការវាយប្រហារតាមអ៊ីនធឺណិតជាមួយរុស្ស៊ី ដោយណាតូ​បានបង្កើតមជ្ឈមណ្ឌលអ៊ីនធឺណិតនៅតំបន់បាល់ទិក និងប៉ូឡូញ ហើយថែមទាំងបណ្តុះបណ្តាលអ្នកឯកទេសអ៊ុយក្រែនអស់រយៈពេលជាយូរមកហើយ ខណៈដែលកងកម្លាំងសន្តិសុខអ៊ុយក្រែន និងសកម្មជនសហគមន៍ផ្សេងៗគ្រាន់តែជាតួជំនួសប៉ុណ្ណោះ ។

សមាជិកក្រុម RaHDit បន្ថែមទៀតថា ក្រុម Hacker អ៊ុយក្រែនឈ្មោះ IT Army of Ukraine និង Save UA ជាក្រុម Hacker ពិតរបស់អ៊ុយក្រែន ប៉ុន្តែណាតូក៏ជាអ្នកនៅពីក្រោយអ៊ុយក្រែនដែលកំពុងធ្វើសកម្មភាពតទល់ជាមួយរុស្ស៊ីផងដែរ ហើយពេលនេះសង្រ្គាមប្រឆាំងរុស្ស៊ីចាប់ផ្តើមកើតឡើងទម្រង់ផ្សេងមួយទៀត គឺសង្គ្រាមអ៊ីនធឺណិត ។

គួរបញ្ជាក់ថា កាលពីថ្ងៃពុធ ក្រុម RahDit ក៏បានចេញផ្សាយផងដែរពីទិន្នន័យទាក់ទងនឹងមន្ត្រី និងទាហានអ៊ុយក្រែន ៧០ នាក់នៅក្នុងប្រព័ន្ធការពារការវាយប្រហារតាមអ៊ីនធឺណិត និងប្រតិបត្តិការលួចចូលផងដែរ ៕

ប្រែសម្រួលដោយ ៖ រតនៈ

ប្រភព ៖ Sputnik

ចុចអាន ៖ ពលរដ្ឋទីក្រុង កៀវ ៣០ ម៉ឺននាក់កំពុងរងាញ័រញាក់ ដោយសារមិនមាន ម៉ាស៊ីនកម្ដៅខ្លួន និងអគ្គិសនីប្រើប្រាស់