តៃវ៉ាន់ សុំឲ្យ អាល្លឺម៉ង់ ជួយរក្សាសណ្តាប់ធ្នាប់ក្នុងតំបន់

ប្រធានាធិបតីតៃវ៉ាន់ លោកស្រី Tsai Ing-wen បានអំពាវនាវឲ្យប្រទេសអាល្លឺម៉ង់ ជួយរក្សាសណ្តាប់ធ្នាប់ក្នុងតំបន់ ក្នុងអំឡុងពេលកិច្ចប្រជុំជាមួយសមាជិកសភាជាន់ខ្ពស់ទីក្រុងបែរឡាំង ដែលបំពេញទស្សនកិច្ចកោះនេះនៅថ្ងៃអង្គារទី១០ខែមករា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កោះតៃវ៉ាន់ ដែលចិនអះអាងថាជាទឹកដីរបស់ខ្លួន កំពុងស្វះស្វែងរកការគាំទ្រពីសម្ព័ន្ធមិត្តប្រជាធិបតេយ្យលោកខាងលិច ស្របពេលប្រឈមមុខនឹងការគំរាមកំហែងផ្នែកយោធារបស់ចិន រួមទាំងសមយុទ្ធសង្គ្រាម ដែលរៀបចំឡើងដោយទីក្រុងប៉េកាំង​ នៅជិតកោះនេះកាលពីខែសីហាផងដែរ។

ខណៈជួបជាមួយលោកស្រី Marie-Agnes Strack-Zimmermann ប្រធានគណៈកម្មាធិការការពារសភារបស់ប្រទេសអាល្លឺម៉ង់ និងជាសមាជិកនៃគណបក្ស Free Democrats របស់អធិការបតី Olaf Scholz, លោកស្រី Tsai បាននិយាយថា នៅចំពោះមុខការពង្រីកអំណាចផ្តាច់ការ លទ្ធិប្រជាធិបតេយ្យត្រូវតែឈរជាមួយគ្នា។

លោកស្រីបន្តថា “ចាប់ពីឆ្នាំក្រោយទៅ សេវាយោធាជាកាតព្វកិច្ចរបស់កោះតៃវ៉ាន់ នឹងបន្តដល់មួយឆ្នាំទៀត។ នេះនឹងពង្រឹងសមត្ថភាពការពារជាតិរបស់យើង និងបង្ហាញពីការប្តេជ្ញាចិត្តរបស់យើងក្នុងការការពារមាតុភូមិរបស់យើង និងការពារលទ្ធិប្រជាធិបតេយ្យ។ យើងទន្ទឹងរង់ចាំតៃវ៉ាន់ អាល្លឺម៉ង់ និងដៃគូប្រជាធិបតេយ្យផ្សេងទៀត រួមគ្នារក្សាសណ្តាប់ធ្នាប់ និងវិបុលភាពក្នុងតំបន់”។

ថ្វីបើអាល្លឺម៉ង់ ក៏ដូចជាប្រទេសភាគច្រើនទៀត គ្មានទំនាក់ទំនងការទូតផ្លូវការជាមួយកោះតៃវ៉ាន់ក៏ដោយ ប៉ុន្តែទីក្រុងបែរឡាំង កំពុងធ្វើការលើយុទ្ធសាស្រ្តថ្មីមួយ ដោយដកឃ្លាទំនាក់ទំនងរបស់ខ្លួនជាមួយប្រទេសចិន និងមានបំណងកាត់បន្ថយការពឹងផ្អែករបស់ខ្លួនលើមហាអំណាចសេដ្ឋកិច្ចរបស់អាស៊ីមួយនេះ៕

ប្រែសម្រួល៖ Vann Vann

ប្រភព៖ Reuters

ចុចអាន៖ តៃវ៉ាន់ ថ្កោលទោស ចិន ចំពោះ សមយុទ្ធ យោធាចុងក្រោយ