ក្រសួងការពារជាតិតៃវ៉ាន់ បាននិយាយនៅថ្ងៃសុក្រទី២០ខែមករានេះថា កងកម្លាំងប្រដាប់អាវុធរបស់កោះនេះ បានប្រទះឃើញយន្តហោះចំនួន៣១គ្រឿង និងនាវាចំនួន៤គ្រឿង របស់កងទ័ពរំដោះប្រជាជនចិន (PLA) ដែលចូលមកជិតកោះនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងបាននិយាយនៅលើ Twitter ថា “យន្តហោះរបស់ PLA ចំនួន៣១គ្រឿង និងនាវារបស់កងទ័ពជើងទឹករំដោះប្រជាជន (PLAN) ចំនួន៤គ្រឿង នៅជុំវិញកោះតៃវ៉ាន់ ត្រូវបានប្រទះឃើញនៅម៉ោង ៦ព្រឹកថ្ងៃនេះ”។

ក្រសួងបន្ថែមថា យន្តហោះចិនចំនួន១២គ្រឿង ដោយក្នុងនោះរួមមានយន្តហោះចម្បាំងធុន J-11 ចំនួនប្រាំមួយគ្រឿង, យន្តហោះ J-16 បីគ្រឿង, យន្តហោះ J-10 ពីរគ្រឿង និងយន្តហោះគ្មានមនុស្សបើក BZK-007 មួយគ្រឿង គឺបានឆ្លងកាត់ខ្សែបន្ទាត់កណ្តាលនៃច្រកសមុទ្រតៃវ៉ាន់។

ក្រសួង​បាន​កត់សម្គាល់​ថា ជា​ការឆ្លើយតប តៃវ៉ាន់​បាន​បញ្ជូន​កង​ល្បាត​តាម​អាកាស និង​សមុទ្រ​ដើម្បី​តាមដាន​ស្ថានការណ៍ ហើយបាន​ដាក់​ពង្រាយ​ប្រព័ន្ធ​មី​ស៊ី​លបាញ់ចេញពីដីគោក​។

គួរបញ្ជាក់ជាថ្មី ស្ថានការណ៍ជុំវិញកោះតៃវ៉ាន់ បានឡើងកម្តៅខ្លាំង បន្ទាប់ពីប្រធានសភាអាមេរិកលោកស្រី Nancy Pelosi ធ្វើទស្សនកិច្ចកោះនេះកាលពីដើមខែសីហា។

ទីក្រុងប៉េកាំងបានថ្កោលទោសដំណើររបស់លោកស្រី Pelosi ដែលខ្លួនចាត់ទុកថាជាកាយវិការគាំទ្រចំពោះការបំបែកខ្លួន ហើយបានចាប់ផ្តើមសមយុទ្ធយោធាទ្រង់ទ្រាយធំនៅតំបន់ជុំវិញកោះនេះ។

យ៉ាងណាក្តី ចាប់តាំងពីពេលនោះមក ប្រទេសមួយចំនួន រួមទាំងបារាំង អាមេរិក និងជប៉ុនផងដែរ បានបញ្ជូនគណៈប្រតិភូរបស់ពួកគេទៅកាន់កោះនេះ ជាហេតុកាន់តែធ្វើឲ្យមានភាពតានតឹងខ្លាំងនៅក្នុងច្រកសមុទ្រតៃវ៉ាន់៕

ប្រែសម្រួល៖ Vann Vann

ប្រភព៖ Sputnik

ចុចអាន៖ តៃវ៉ាន់ ព្រមានថា ៤ឆ្នាំទៀត ចិននឹងបើកការវាយលុក