ថៃបង្ក្រាបគ្រឿងញៀនបង្កប់ក្នុងសន្លឹកកុងផ្លាកេ ជិត៦លានគ្រាប់

ថ្នាំញៀនប្រភេទយ៉ាម៉ា ប្រមាណជិត៦លានគ្រាប់ ត្រូវបានកម្លាំងផ្នែកប្រឆាំងញ្រឿងញៀនតាមប្រមាញ់ និងបង្ក្រាបបាន រួមជាមួយមនុស្ស៥នាក់ ខណ:ដែលពួកគេកំពុងធ្វើចរាចរដោយបានដាក់បង្កប់ថ្នាំញៀនទាំងនោះនៅក្នុងរថយន្តដឹកកុងផ្លាកេ ។

យោងតាមការផ្សាយរបស់កាសែតថៃរ៉ាត់ បានបញ្ជាក់ថា កិច្ចប្រតិបត្តិការរបស់សមត្ថកិច្ចថៃ បានធ្វើឡើងកាលពីរសៀលថ្ងៃទី២៧ ខែមករា ឆ្នាំ២០២៣ នៅចំណុចឃុំចេតីយ៍ម៉ៃ ស្រុកវៀងប៉ាក់ប៉ៅ ខេត្តឈៀងរ៉ាយ ប្រទេសថៃ។

កាសែតបានបន្តថា នៅមុនពេលកើតហេតុ គឺមានរថយន្តចំនួន៣គ្រឿង ដោយរត់មុខក្រោយ រីឯរថយន្តកណ្តាលគឺម៉ាកអុីស៊ុយៗ ព៌ណខៀវ មានផ្ទុកសន្លឹកកុងផ្លាកេពេញទ្រុងខាងក្រោយ ដោយមានការសង្ស័យសមត្ថកិច្ចបានឃាត់ជាប់រថយន្តទាំង៣គ្រឿង និងបានបើកសន្លឹកក្តារកុងផ្លាកេខាងលើចេញ គឺបានប្រទះឃើញមានការ៉ុងច្រកទំនិញចំនួន៤០​ការ៉ុង ដែលគេដាក់នៅកណ្តាលក្តារកុងផ្លាកេ។

ក្រោយការត្រួតពិនិត្យ គឺនៅក្នុងការ៉ុងសុទ្ធសឹងជាគ្រឿងញៀនទាំងអស់ ជាប្រភេទយ៉ាម៉ា ដែលសរុបមានចំនួន៥.៩១៤.០០០​ គ្រាប់ បើគិតជាទឹកប្រាក់ប្រមាណជិត៣០លានបាត រីឯស្លាកលេខរថយន្តក៏គេបន្លំដាក់ស្លាកលេខផ្សេងនៅពីខាងក្រៅដែរ ដើម្បីបន្លំភ្នែកសមត្ថកិច្ច។

ក្រោយពេលកើតហេតុ សមត្ថកិច្ចថៃបាននាំខ្លួនមនុស្សទាំង៥នាក់យកទៅសាកសួរបន្ថែម ដើម្បីបញ្ជូនខ្លួនរួមជាមួយវត្ថុតាងទៅតុលាការ ៕

អត្ថបទ៖ សោ និយមរ័ត្ន