អតីតមន្ត្រីប៉ូលិសទីក្រុង Memphis នៃរដ្ឋ Tennessee របស់សហរដ្ឋអាមេរិកចំនួន ៥ នាក់ត្រូវបានចោទប្រកាន់ពីបទឃាតកម្មលើបុរសស្បែកខ្មៅម្នាក់ឈ្មោះ Tyre Nichols ក្រោយវាយដុំបុរសនោះឲ្យរងរបួសធ្ងន់រហូតដល់ស្លាប់នៅមន្ទីរពេទ្យ ។

លោក Nichols បានស្លាប់អំឡុងពេលសម្រាកនៅមន្ទីរពេទ្យ ពោលរយៈពេល ៣ ថ្ងៃ បន្ទាប់ពីត្រូវបានឃាត់ខ្លួន និងរងការវាយដុំពីសំណាក់ប៉ូលិសទាំង ៥ នាក់កាលពីថ្ងៃទី៧ ខែមករា ឆ្នាំ២០២៣ ដោយសារតែបទចោទប្រកាន់ធ្វេសប្រហែសក្នុងការបើកបរ ។

ទន្ទឹមនោះព្រះរាជអាជ្ញាបាននិយាយថា មន្ត្រីទាំង ៥ នាក់ ដែលសុទ្ធសឹងជាជនជាតិស្បែកខ្មៅ គឺត្រូវបានចោទប្រកាន់ជាច្រើនករណី ដូចជា ប្រព្រឹត្តឃាតកម្មកម្រិតទី ២, ការវាយដុំដោយហិង្សា, ការចាប់ជំរិតដោយហិង្សា ការប្រព្រឹត្តិខុសក្រមសីលធម៌ និងការរំលោភសិទ្ធិអ្នកដទៃជាដើម ។

គួរបញ្ជាក់ថា មន្ត្រីប៉ូលិសទាំង ៥ នាក់ត្រូវបានបណ្តេញចេញពីតួនាទីរួចហើយកាលពីថ្ងៃសៅរ៍សប្តាហ៍មុន បន្ទាប់ពីការស៊ើបអង្កេតផ្ទៃក្នុងបានរកឃើញថា ពួកគេបានរំលោភលើគោលនយោបាយជាច្រើនរបស់នាយកដ្ឋានប៉ូលិសក្រុង Memphis រួមទាំងការប្រើប្រាស់កម្លាំងហួសហេតុ ការខកខានក្នុងការធ្វើអន្តរាគមន៍ ក៏ដូចជាអាក់ខានបំពេញកាតព្វកិច្ចផ្សេងៗទៀត ហើយពួកគេទាំង ៥ នាក់ក៏​ត្រូវ​បាន​ចាប់​​ឃុំ​ខ្លួន​កាល​ពី​ព្រឹក​ថ្ងៃ​ព្រហស្បតិ៍​កន្លងទៅផងដែរ ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ RT

ចុចអាន ៖ រុស្ស៊ី បន្តបាញ់មីស៊ីលស្រោចលើ អ៊ុយក្រែន ខណៈក្រុងកៀវ កំពុងចាំរថក្រោះ