រុស្ស៊ី រិះគន់ទណ្ឌកម្មរបស់ អ៊ុយក្រែន ថាខ្ជះខ្ជាយពេលវេលា

លោក Renat Karchaa ទីប្រឹក្សានាយកប្រតិបត្តិនៃរោងចក្រថាមពលនុយក្លេអ៊ែរ Rosenergoatom របស់រុស្ស៊ី ប្រាប់ប្រព័ន្ធផ្សព្វផ្សាយ TASS ថា ទណ្ឌកម្មរបស់អ៊ុយក្រែនកំពុងធ្វើឲ្យខ្ជះខ្ជាយពេលវេលា ហើយវានឹងមិនប៉ះពាល់ដល់ការងារក្រុមហ៊ុនថាមពលនុយក្លេអ៊ែរ Rosatom របស់រុស្ស៊ីនោះទេ ។

លោក​ Renat Karchaa បញ្ជាក់ថា ទណ្ឌកម្មទាំងនោះមិនអាចមានឥទ្ធិពលលើក្រុមហ៊ុនថាមពលរបស់យើងបាននោះទេ ដោយសារតែទី១ គឺតំបន់ Zaporozhye និងទីក្រុង Energodar គឺជាផ្នែកមួយនៃទឹកដីប្រទេសរុស្ស៊ី ហើយទី ២ គឺរុស្ស៊ីចាត់ទុករោងចក្រថាមពលនុយក្លេអ៊ែរ Zaporozhye ជាកម្មសិទ្ធិរបស់ខ្លួន ដូច្នេះរាល់បញ្ហាដោះស្រាយទាំងអស់ បានចែងក្នុងក្រឹត្យប្រធានាធិបតីរួចហើយ ។

ចំពោះទី ៣ វិញគឺរុស្ស៊ីធានាបានសន្តិសុខបរិក្ខារនុយក្លេអ៊ែរទាំងអស់ ដូចនេះ ទណ្ឌកម្ម​មិន​អាច​ប៉ះពាល់​ដល់​ទិដ្ឋភាព​ទាំង​បី​នោះ​ទេ ។

មិនតែប៉ុណ្ណោះ លោកKarchaa បញ្ជាក់បន្ថែមថា ប្រាកដណាស់​ ទោះអ៊ុយក្រែនប្រកាសដាក់ទណ្ឌកម្មក៏ដោយ ក៏វាគ្មានប្រសិទ្ធភាព ឬធ្វើឲ្យរុស្ស៊ីឈឺក្បាលអ្វីឡើយ ។

ទាក់ទងជាមួយទណ្ឌកម្មនេះ ប្រធានាធិបតីអ៊ុយក្រែន លោក Zelensky ទើបប្រកាសឲ្យពិភពលោកដាក់ទណ្ឌកម្មកាន់តែខ្លាំងលើប្រព័ន្ធហិរញ្ញវត្ថុរុស្ស៊ី និងទៅលើ​រោងចក្រថាមពលនុយក្លេអ៊ែររបស់រុស្ស៊ីជាដើម ៕

ប្រែសម្រួលដោយ ៖ នាង​ រតនៈ

ប្រភព ៖​ TASS

ចុចអាន ៖ អាមេរិក ត្រៀមលក់ប្រេងឆៅ ២៦ លានបារ៉ែលទៅកាន់ទីផ្សារពិភពលោក