អាមេរិក ត្រៀមលក់ប្រេងឆៅ ២៦ លានបារ៉ែលទៅកាន់ទីផ្សារពិភពលោក

យោងតាមរបាយការណ៍នៅក្នុងប្រព័ន្ធផ្សព្វផ្សាយអាមេរិកបានឲ្យដឹងកាលពីថ្ងៃចន្ទថា ក្រសួងថាមពលអាមេរិក កំពុងរៀបចំបញ្ចេញប្រេងឆៅលក់ចំនួន ២៦ លានបារ៉ែលទៀតពីទុនបម្រុងយុទ្ធសាស្ត្រអាមេរិកទៅក្នុងទីផ្សារប្រេងពិភពលោក ។

ទន្ទឹមនោះ ទិន្នន័យពីរដ្ឋបាលព័ត៌មានថាមពល (EIA) ក៏បានឲ្យដឹងដែរថា បច្ចុប្បន្នទុនបម្រុងយុទ្ធសាស្ត្រនេះ មានប្រេងប្រហែល ៣៧១.៥៨ លានបារ៉ែល ដោយក្នុងនោះ វាមានសមត្ថភាពផ្ទុកបាន ៧១៤ លានបារ៉ែលឯណោះ ។

ការបញ្ចេញប្រេងនេះបានកើតឡើង ក្រោយពេលដែលតម្លៃប្រេងសាំងនៅអាមេរិកចាប់ផ្តើមឡើងថ្លៃម្តងទៀត បន្ទាប់​ពី​​ធ្លាក់​ចុះ​ទាប​ក្នុង​រយៈ​ពេល ១៦ ខែ​កាល​ពី​ចុង​ខែ​ធ្នូ ។ ក្នុងនោះ តម្លៃជាមធ្យមនៅថ្ងៃទី ២៦ ខែធ្នូ ឆ្នាំ ២០២២ គឺត្រឹមតែ ៣.០៩ ដុល្លារប៉ុណ្ណោះក្នុងមួយហ្គាឡុង ខណៈនៅចុងសប្តាហ៍ដំបូងនៃខែកុម្ភៈ ឆ្នាំ២០២៣ គឺមានតម្លៃ ៣.៤៤ ដុល្លារ ។

ដោយឡែក សម្រាប់តម្លៃប្រេងឆៅ នៅតែមានស្ថិរភាពក្នុងរយៈពេលជាច្រើនខែ ដោយក្រុមហ៊ុន West Texas Intermediate (WTI) លក់ក្នុងតម្លៃ ៧៩.២៦ ដុល្លារកាលពីថ្ងៃចន្ទ ខណៈប្រេងឆៅម៉ាក Brent ដែលបូមនៅប្រទេសន័រវេស លក់ក្នុងតម្លៃ ៨៥.៩០ ដុល្លារក្នុងមួយបារ៉ែល ។

ទាក់ទិននឹងប្រេងបម្រុងរបស់អាមេរិកនេះដែរ ក៏ធ្លាប់ត្រូវបានបង្ហូរចេញកាលពីឆ្នាំមុន ដើម្បីជាការឆ្លើយតបទៅរុស្ស៊ី ជុំវិញ​បញ្ហាផ្គត់ផ្គង់ប្រេង ។ ចំណាត់ការនេះ គឺជាការសងសឹកចំពោះប្រតិបត្តិការសឹករបស់រុស្ស៊ីនៅអ៊ុយក្រែន ដែលបានចាប់ផ្តើមកាលពីខែកុម្ភៈ ឆ្នាំ២០២២ បន្ទាប់ពីអាមេរិកបានបដិសេធមិនចរចាលើខ្សែបន្ទាត់ក្រហមសន្តិសុខរបស់រុស្ស៊ី ក្នុងនោះក៏មានអ៊ុយក្រែនផងដែរ ដែលត្រូវបានប្រើជាមូលដ្ឋានសម្រាប់អាវុធរបស់អង្គការណាតូ ។

គួរបញ្ជាក់ថា កាលពីខែកញ្ញាឆ្នាំមុនសេតវិមានក៏បានពិចារណាលើការបំពេញប្រេងបម្រុងផងដែរ ប្រសិនបើតម្លៃប្រេងធ្លាក់ចុះក្រោម ៨០ ដុល្លារក្នុងមួយបារ៉ែល ៕

ប្រែសម្រួលដោយ ៖ នាង រតនៈ

ប្រភព ៖ Sputnik

ចុចអាន ៖ អ្នកនៅរស់ពីការរញ្ជួយដីតួកគី កំពុងប្រឈមនឹងគ្រោះថ្នាក់ដល់ជីវិតមួយទៀត