ព័ត៌មានអន្ដរជាតិ

លោក Zelensky សរសើរប្រជាជន អ៊ុយក្រែន តស៊ូរស់នៅផុតរដូវរងា

បានផុស

២ ខែ មុន

នៅ

ថ្ងៃព្រហស្បតិ៍ ២ មីនា ២០២៣

ដោយ

ប្រធានាធិបតីអ៊ុយក្រែនលោក Volodymyr Zelensky បាននិយាយថា ប្រជាជនរបស់លោកបានរួចផុតពីរដូវរងាដ៏លំបាកហើយ ដោយសារតែការខិតខំប្រឹងប្រែងរបស់រដ្ឋាភិបាលក្នុងការធានាថាមពល និងកម្ដៅ ចំពេលមានការវាយប្រហាររបស់រុស្ស៊ីលើហេដ្ឋារចនាសម្ព័ន្ធ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសារវីដេអូមួយកាលពីថ្ងៃពុធ លោក Zelensky បាននិយាយថា “រដូវរងានេះបានបញ្ចប់ហើយ ។ វាពិតជាលំបាកខ្លាំងណាស់ ប៉ុន្តែប្រជាជនអ៊ុយក្រែនគ្រប់រូបបានតស៊ូរស់នៅ និងបានយកឈ្នះភាពលំបាកនេះ ដោយសារតែយើងនៅតែអាចផ្តល់ថាមពល និងកម្ដៅដល់ពួកគេ” ។

លោក Zelensky បាននិយាយទៀតថា លោកបានបើកកិច្ចប្រជុំស្តីពីស្ថិរភាពនៃហេដ្ឋារចនាសម្ព័ន្ធថាមពលរបស់ប្រទេស ហើយថា រដ្ឋាភិបាលបានចាប់ផ្តើមរៀបចំរួចហើយសម្រាប់រដូវបន្តបន្ទាប់ទៀត បើទោះបីជា រុស្ស៊ីកំពុងបង្កើនការវាយប្រហាររបស់ខ្លួនដើម្បីគ្រប់គ្រងទាំងស្រុងនូវតំបន់ Donbas ភាគខាងកើតរបស់អ៊ុយក្រែនក៏ដោយ ។

ប៉ុន្តែទោះជាយ៉ាងណា អ៊ុយក្រែនក៏បានប្រកាសពីផែនការបើកការវាយលុកដ៏ធំមួយនៅចន្លោះខែមេសា និងខែឧសភា ដើម្បីដណ្តើមយកទឹកដីអ៊ុយក្រែន ដែលរុស្សីរឹបអូសមកវិញផងដែរ ។

នៅក្នុងបទសម្ភាសន៍ជាមួយប្រព័ន្ធផ្សព្វផ្សាយអាល្លឺម៉ង់ដែលបានចេញផ្សាយកាលពីថ្ងៃអាទិត្យ អនុប្រធានផ្នែកចារកម្មយោធារបស់អ៊ុយក្រែន លោក Vadym Skibitsky បាននិយាយថា គោលបំណងនៃការវាយលុកនេះ គឺដើម្បីបំបែកចូលទៅក្នុងកម្លាំងជួរមុខរុស្ស៊ីនៅភាគខាងត្បូងរវាងតំបន់គ្រីមៀ និងរុស្ស៊ីដីគោក” ។

គួរបញ្ជាក់ថា ប្រតិបត្តិការសឹករបស់រុស្ស៊ីដែលលោក វ្ល៉ាឌីមៀរ ពូទីន ប្រកាសបើកការលុកលុយលើអ៊ុយក្រែនកាលពីថ្ងៃទី២៤ ខែកុម្ភៈ ឆ្នាំ២០២២ បានអូសបន្លាយពេល ១ ឆ្នាំហើយ ខណៈរហូតមកដល់ពេលនេះ ក៏មិនទាន់មានសញ្ញាថមថយនៅឡើយផងដែរ ៕