អង្គការ OPEC+ នឹងនៅតែកាត់បន្ថយការផលិតប្រេងដដែល

រដ្ឋមន្ត្រីថាមពលអារ៉ាប៊ីសាអូឌីតព្រះអង្គម្ចាស់ Abdulaziz bin Salman លើកឡើងថា ការកាត់បន្ថយផលិតកម្មប្រេងដែលបានយល់ព្រមដោយអង្គការ OPEC+ ត្រូវបានរក្សានៅដដែល​ ដោយសារតែសេដ្ឋកិច្ចពិភពលោក​នៅតែប្រឈមភាពមិនច្បាស់លាស់ ។

កាលពីខែតុលា អារ៉ាប៊ីសាអូឌីត​ ដែលជាប្រទេសដឹកនាំផលិតប្រេង បានយល់ព្រមកាត់បន្ថយផលិតប្រេងចំនួន ២ លានបារ៉ែលក្នុងមួយថ្ងៃ ដើម្បីគាំទ្រដល់តម្លៃប្រេងឆៅ ។

ព្រះអង្គម្ចាស់ Bin Salman មានព្រះបន្ទូលថា ទ្រង់នៅតែមិនទាន់ប្រាកដច្បាស់ឡើយចំពោះស្ថានភាពកំណើនសេដ្ឋកិច្ចពិភពលោក ស្របពេលសេដ្ឋកិច្ចចិនក៏ទើបតែងើបឡើងវិញ ដូចនេះមិនដឹងថាត្រូវចំណាយពេលវេលាប៉ុន្មានទើបបានប្រសើរនោះឡើយ ជាពិសេសធនាគារកណ្តាល អាចនឹងបង្កើនកិច្ចខិតខំប្រឹងប្រែងដើម្បីទប់ស្កាត់អតិផរណា ហើយសកម្មភាពតែមួយគត់នោះ គឺរក្សាគោលដៅផលិតកម្មប្រេងដោយមិនផ្លាស់ប្តូរ ។

គួរបញ្ជាក់ថា កាលពីឆ្នាំមុន​ តម្លៃប្រេងឆៅ​​ឡើងដល់ ១៣០ ដុល្លារក្នុងមួយបារ៉ែល​ ដោយសារតែសង្គ្រាមលុកលុយរបស់រុស្ស៊ីលើអ៊ុយក្រែន ខណៈបច្ចុប្បន្ននេះ តម្លៃប្រេងមានការធ្លាក់ចុះនៅចន្លោះពី ៧២ ទៅ ៨៣ ដុល្លារក្នុងមួយបារ៉ែល ៕

ប្រែសម្រួល៖ នាង រតនៈ

ប្រភព ៖​ NHK

ចុចអាន ៖ អ្នកជំនាញ ៖ បើ អាមេរិក នៅតែបន្តដំឡើងអត្រាការប្រាក់ នោះធនាគារ​ជាច្រើនទៀតនឹងដួលរលំ