យោធាមីយ៉ាន់ម៉ា រំលាយគណបក្សរបស់លោកស្រី អ៊ុងសាន ស៊ូជី (មានវីដេអូ)

គណៈកម្មាធិការរៀបចំការបោះឆ្នោតមីយ៉ាន់ម៉ា បានប្រកាសកាលពីថ្ងៃអង្គារទី២៨ខែមីនាថា គណបក្សសម្ព័ន្ធជាតិដើម្បីលទ្ធិប្រជាធិបតេយ្យ (NLD) របស់លោកស្រី អ៊ុងសាន ស៊ូជី នឹងត្រូវរំលាយដោយសារខកខានក្នុងការចុះឈ្មោះឡើងវិញ ក្រោមច្បាប់បោះឆ្នោតថ្មីដែលតាក់តែងដោយយោធា។

ទូរទស្សន៍រដ្ឋ MRTV ផ្សាយថា ក្នុងចំណោមគណបក្សដែលមានស្រាប់ចំនួន៩០ មានតែ ៥០បក្សប៉ុណ្ណោះ ដែលបានដាក់ពាក្យសុំចុះឈ្មោះឡើងវិញក្រោមច្បាប់ថ្មីនេះ ខ​ណៈគណបក្សនៅសេសសល់នឹងត្រូវរំលាយចាប់ពីថ្ងៃពុធទៅ។

គួរបញ្ជាក់ថា លោកស្រី ស៊ូជី បានចូលរួមបង្កើតគណបក្ស NLD ក្នុងឆ្នាំ១៩៨៨ ហើយទទួលជ័យជម្នះភ្លូកទឹកភ្លូកដីនៅក្នុងការបោះឆ្នោតឆ្នាំ១៩៩០។

មកដល់ឆ្នាំ២០២០ គណបក្ស NLD​ បានឈ្នះឆ្នោតម្តងទៀត ប៉ុន្តែនៅឆ្នាំ២០២១ យោធាបានធ្វើរដ្ឋប្រហារក្នុងខែកុម្ភៈ ជាមួយនឹងការអះអាងអំពីការក្លែងបន្លំសន្លឹកឆ្នោត ដែលជាហេតុកាត់ផ្តាច់ប្រទេសនេះពីលទ្ធិប្រជាធិបតេយ្យរយៈពេល១០ឆ្នាំ និងធ្វើឲ្យមីយ៉ាន់ម៉ាធ្លាក់ចូលក្នុងភាពចលាចល។

ក្នុងខែមករាឆ្នាំ២០២៣ យោធាបានទុកពេលពីរខែ ឲ្យគណបក្សនយោបាយទាំងឡាយ ដើម្បីចុះឈ្មោះឡើងវិញនៅក្រោមច្បាប់បោះឆ្នោតថ្មីដ៏តឹងរ៉ឹងដែលសរសេរដោយយោធា មុនពេលការបោះឆ្នោតថ្មីដែលខ្លួនសន្យាថានឹងរៀបចំ ប៉ុន្តែគូប្រជែងរបស់ខ្លួននិយាយថា ការបោះឆ្នោតនោះនឹងមិនសេរី ឬគ្មានយុត្តិធម៌ឡើយ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ CNA

ចុចអាន៖ តុលាការ មីយ៉ាន់ម៉ា បិទបញ្ចប់សវនាការសម្រេចឲ្យលោកស្រី អ៊ុងសាន ស៊ូជី ជាប់ពន្ធនាគារសរុប ៣៣ ឆ្នាំ