មេទាហានស៊ីឈ្នួលរុស្ស៊ី ប្រកាសវាយយកបានទីក្រុង Bakhmut

កាលពីល្ងាចថ្ងៃអាទិត្យទី០២ខែមេសា ប្រមុខក្រុមហ៊ុនយោធាឯកជនរុស្ស៊ី (PMC) លោក Evgeny Prigozhin បានប្រកាសពីសមិទ្ធិផលដ៏សំខាន់មួយនៅក្នុងការប្រយុទ្ធដើម្បីទីក្រុង Artryomovsk ឬគេស្គាល់នៅប្រទេសអ៊ុយក្រែនថាជាទីក្រុង Bakhmut។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយបង្ហោះវីដេអូនៅខាងមុខអគាររដ្ឋបាលរបស់ទីក្រុង លោក Prigozhin បាននិយាយនៅក្នុងឃ្លីបនោះថា “យើងបានលើកទង់ជាតិរុស្ស៊ីជាមួយនឹងសិលាចារឹកថា “ការចងចាំល្អចំពោះ Vladlen Tatarsky និងទង់ជាតិរបស់ក្រុមហ៊ុនទាហានស៊ីឈ្នួល Wagner នៅលើកំពូលនៃរដ្ឋបាលទីក្រុង Bakhmut”។

គួរបញ្ជាក់ថា សមរភូមិសម្រាប់ទីក្រុង Bakhmut បានក្លាយជាការប្រយុទ្ធយ៉ាងស្វិតស្វាញ និងបង្ហូរឈាមបំផុតនៃជម្លោះប្រដាប់អាវុធនៅអ៊ុយក្រែន ដោយភាគីទាំងពីរ សុទ្ធតែរាយការណ៍អំពីការខាតបង់ធ្ងន់ធ្ងរ។

ការប្រកាសរបស់លោកមេទាហានស៊ីឈ្នួលរូបនេះ កើតឡើងត្រឹមតែប៉ុន្មានម៉ោងប៉ុណ្ណោះ បន្ទាប់ពីអ្នកសរសេរប្លុកយោធារុស្ស៊ីដ៏ល្បីល្បាញឈ្មោះ Tatarsky ឬមានឈ្មោះពិត Maksim Fomin បានបាត់បង់ជីវិតនៅក្នុងការបំផ្ទុះនៅហាងកាហ្វេមួយកន្លែងក្នុងទីក្រុង Saint Petersburg កាលពីរសៀលថ្ងៃអាទិត្យ។

ទោះបីជាយ៉ាងណាក៏ដោយ មន្ត្រីលោកខាងលិចអះអាងថា ទីក្រុងនេះមិនមានតម្លៃយោធាជាយុទ្ធសាស្ត្រនោះទេ ប៉ុន្តែប្រធានាធិបតីអ៊ុយក្រែន លោក វ្ល៉ាឌីមៀរ ហ្សេលេនស្គី បានសន្យាការពារវាឲ្យបានយូរតាមដែលអាចធ្វើទៅបាន បន្ទាប់ពីប្រកាសថា ទីក្រុងនេះគឺជាបន្ទាយ៕

ប្រែសម្រួល៖ Vann Vann

ប្រភព៖ RT

ចុចអាន៖ សម្ព័ន្ធមិត្តរុស្ស៊ី ព្រមានថា សង្គ្រាមលោកលើកទី៣ ដែលប្រើប្រាស់អាវុធនុយក្លេអ៊ែរ ជិតផ្ទុះឡើងហើយ