សម្ព័ន្ធមិត្តរុស្ស៊ី ព្រមានថា  សង្គ្រាមលោកលើកទី៣ ដែលប្រើប្រាស់អាវុធនុយក្លេអ៊ែរ ជិតផ្ទុះឡើងហើយ

កាលពីថ្ងៃសុក្រ ប្រធានាធិបតីបេឡារុស លោក Alexander Lukashenko បានព្រមានថា សង្គ្រាមលោកលើកទី៣ ដែលប្រើប្រាស់អាវុធនុយក្លេអ៊ែរ ជិតផ្ទុះឡើងហើយ ដោយសារតែអង្គការណាតូ គាំទ្រដល់ទីក្រុង កៀវ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មេដឹកនាំដែលជាសម្ព័ន្ធមិត្តចាក់ទឹកមិនលិចរបស់ប្រធានាធិបតីរុស្ស៊ី វ្ល៉ាឌីមៀរ ពូទីន រូបនេះ ក៏បានអះអាងដែរថា បស្ចិមប្រទេសនឹងវាយលុកប្រទេសបេឡារុស ដើម្បីកម្ទេចចោល។

ក្នុងសុន្ទរកថាផ្សាយតាមទូរទស្សន៍ លោក Lukashenko បានសង្កត់ធ្ងន់ថា ជាលទ្ធផលនៃកិច្ចខិតខំប្រឹងប្រែងរបស់សហរដ្ឋអាមេរិក និងផ្កាយរណបរបស់ខ្លួន, សង្គ្រាមទ្រង់ទ្រាយធំមួយបានផ្ទុះឡើងនៅក្នុងប្រទេសអ៊ុយក្រែន។ សង្រ្គាមលោកលើកទី៣ ជាមួយការបាញ់នុយក្លេអ៊ែរកាន់តែខិតជិតមកដល់។

ទោះបីជាយ៉ាងណាក៏ដោយ លោកបានអំពាវនាវឲ្យមាន “បទឈប់បាញ់” នៅអ៊ុយក្រែន និងបទឈប់បាញ់ជាបន្ទាន់រួមជាមួយនឹងកិច្ចចរចាដោយគ្មានលក្ខខណ្ឌ រវាងទីក្រុងមូស្គូ និងទីក្រុងកៀវ។

គួរបញ្ជាក់ថា ការព្រមានរបស់លោក Lukashenko កើតឡើងត្រឹមតែប៉ុន្មានថ្ងៃប៉ុណ្ណោះ បន្ទាប់ពីគាត់បានប្រកាសអនុញ្ញាតឲ្យរុស្ស៊ី ដាក់ពង្រាយអាវុធនុយក្លេអ៊ែរក្នុងប្រទេសបេឡារុស ដោយសារសម្ពាធកាន់តែខ្លាំងឡើងពីសំណាក់លោកខាងលិច។

លោក ពូទីន បាននិយាយនៅថ្ងៃសៅរ៍ថា រុស្ស៊ីនឹងដាក់ពង្រាយអាវុធនុយក្លេអ៊ែរយុទ្ធសាស្ត្រក្នុងប្រទេសបេឡារុស ដែលជាការដាក់ពង្រាយអាវុធនុយក្លេអ៊ែរលើកដំបូងនៅខាងក្រៅព្រំដែនរបស់ខ្លួនចាប់តាំងពីការដួលរលំនៃសហភាពសូវៀតក្នុងឆ្នាំ១៩៩១មក៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ អ្នកជំនាញប្រាប់លក្ខខណ្ឌមួយ ដែលលោក ពូទីន នឹងបាញ់នុយក្លេអ៊ែរ