អាមេរិក ជួយហ្វឹកហ្វឺន និងបំពាក់អាវុធដល់កងទ័ពអ៊ុយក្រែន សម្រាប់ប្រតិបត្តិការនាពេលខាងមុខ

មេទ័ពអាមេរិកលោក Mark Milley បានប្រាប់សារព័ត៌មាន Foreign Affairs កាលពីថ្ងៃអង្គារទី០២ខែឧសភាថា ទីក្រុងវ៉ាស៊ីនតោនបានជួយហ្វឹកហ្វឺន និងបំពាក់អាវុធដល់យោធាអ៊ុយក្រែនសម្រាប់ប្រតិបត្តិការនាពេលខាងមុខ មិនថាវាយលុក ឬការពារនោះទេ ប៉ុន្តែការប្រយុទ្ធគ្នាទំនងជាមិនអាចរកអ្នកឈ្នះពិតប្រាកដបានឡើយក្នុងឆ្នាំ២០២៣នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅពេលសួរថាតើលោករំពឹងអ្វីខ្លះ ពីការវាយបករបស់អ៊ុយក្រែន? លោក Milley បានប្រាប់ Foreign Affairs ថា សហរដ្ឋអាមេរិក និងដៃគូអង្គការណាតូអឺរ៉ុបរបស់ខ្លួន បានជួយអ៊ុយក្រែនក្នុងការបណ្តុះបណ្តាល និងបំពាក់កងពលចំនួន៩ ជាមួយនឹងអាវុធ រថពាសដែក និងគ្រឿងយន្តថ្មីៗ ក្នុងរយៈពេលប៉ុន្មានខែកន្លងមកនេះ។

លោកបន្តថា ឥឡូវ កងកម្លាំងទីក្រុងកៀវ មានសមត្ថភាពវាយប្រហារ ពួកគេអាចធ្វើប្រតិបត្តិការវាយលុក ហើយពួកគេក៏មានសមត្ថភាពការពារផងដែរ ពោលគឺខ្លាំងជាងឆ្នាំមុន។ ពួកគេមានផែនការ និងមានការសម្របសម្រួលកាន់តែច្រើន។

ស្របពេលជាមួយគ្នានោះ លោក Milley ​អះអាង​ថា យោធា​រុស្ស៊ី​បានបាត់បង់ជីវិតរហូតដល់ទៅ២៥ម៉ឺននាក់ ហើយ​ថា ​កងទ័ព សង្គម និង​សេដ្ឋកិច្ច​របស់ទីក្រុងមូស្គូ បាន​រង​ផល​ប៉ះពាល់​យ៉ាង​ធ្ងន់ធ្ងរ​ដោយសារ​ជម្លោះនេះ។

ទោះបីជាយ៉ាងណាក៏ដោយ លោកមិនបញ្ជាក់ពី​ការ​ស្លាប់​និង​របួស​នៅខាង​អ៊ុយក្រែននោះ​ទេ ខណៈវិមានក្រឹមឡាំងបានសើចចំអកលើការប៉ាន់ស្មាននេះ ដោយអះអាងថា វាគឺជារឿងប្រឌិតទាំងស្រុង៕

ប្រែសម្រួល៖ Vann Vann

ប្រភព៖ RT

ចុចអាន៖ អាមេរិក បង្ហាញចំនួនទាហានរុស្ស៊ី ដែលស្លាប់និងរបួសនៅទីក្រុង Bakhmut