ចិន ប្រកាសសហការជាមួយរុស្ស៊ី ​ដោះស្រាយ​វិបត្តិ​អ៊ុយក្រែន

ក្នុងអំឡុងកិច្ចពិភាក្សាកាលពីថ្ងៃព្រហស្បតិ៍ទី៤ខែឧសភា ជាមួយសមភាគីរុស្ស៊ី Sergey Lavrov នៅក្នុងប្រទេសឥណ្ឌា, រដ្ឋមន្ត្រីការបរទេសចិនលោក Qin Gang បាននិយាយថា ភាគីចិន បានត្រៀមខ្លួនរួចជាស្រេចក្នុងកិច្ចសហប្រតិបត្តិការជាមួយរុស្ស៊ី ដើម្បីរួមចំណែកជាក់ស្តែង ដោះស្រាយវិបត្តិអ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គេហទំព័ររបស់ក្រសួងការបរទេសចិន បានដកស្រង់សម្តីលោក Qin Gang ដែលនិយាយថា “ប្រទេសចិននឹងបន្តជួយ និងជំរុញកិច្ចចរចាសន្តិភាព។ យើងត្រៀមខ្លួនរួចជាស្រេចក្នុងការរួមចំណែកជាក់ស្តែង ដើម្បីដោះស្រាយវិបត្តិនយោបាយអ៊ុយក្រែន តាមរយៈទំនាក់ទំនង និងការសម្របសម្រួលជាមួយរុស្ស៊ី”។

ក្នុង​ជំនួប​នោះ អ្នក​ការទូត​កំពូល​ចិនក៏​បាន​និយាយដែរ​ថា ទំនាក់ទំនង​រវាង​ទីក្រុង​ប៉េកាំង និង​ ​មូស្គូ​កាន់តែស្អិតរមួត ​បន្ទាប់​ពី​ដំណើរ​ទស្សនកិច្ច​របស់ប្រធានាធិបតី​ចិន​លោក Xi Jinping ​ទៅ​កាន់​ប្រទេស​រុស្ស៊ី​កាល​ពី​ពេល​ថ្មីៗ​នេះ។

អ្នកការទូតដដែលបន្ថែមថា “ប្រទេសចិនបានត្រៀមខ្លួនរួចជាស្រេច ដើម្បីពង្រឹងទំនាក់ទំនងយុទ្ធសាស្ត្រជាមួយរុស្ស៊ី និងធ្វើឲ្យកិច្ចសហប្រតិបត្តិការកាន់តែស៊ីជម្រៅលើគ្រប់វិស័យ”។

ស្របពេលជាមួយគ្នានោះដែរ ភាគីទាំងពីរបានអះអាងជាថ្មី នូវចេតនារបស់ខ្លួនក្នុងការកែលម្អការសម្របសម្រួលក្នុងក្របខ័ណ្ឌនៃអង្គការអន្តរជាតិសំខាន់ៗ និងទម្រង់នានាដូចជា អង្គការកិច្ចសហប្រតិបត្តិការសៀងហៃ (SCO), BRICS, ក្រុម G20 និងអង្គការសហប្រជាជាតិជាដើម៕

ប្រែសម្រួល៖ Vann Vann

ប្រភព៖ TASS

ចុចអាន៖ ចិន ថា ការពង្រីកខ្លួនរបស់ ណាតូ នៅអាស៊ី ចៀសមិនរួចទេ នឹងមានការ បំផ្លាញសន្តិភាពក្នុងតំបន់