រោងចក្រផលិតប្រអប់ស្នោដ៏ធំនៅប្រទេសថៃ ត្រូវភ្លើងឆេះរបួសកម្មករច្រើននាក់

រោងចក្រផលិតរបស់ប្រើប្រាស់ដែលធ្វើអំពីស្នោដ៏ធំនៅក្នុងប្រទេសថៃ ត្រូវបានអគ្គិភ័យលេបត្របាក់ទាំងស្រុង ស្របពេលដែលអាកាសធាតុនៅក្នុងប្រទេសថៃកំពុងហក់ឡើងខ្លាំង ព្រមទាំងបង្កអោយកម្មករជាច្រើននាក់រងរបួស។

ហេតុការណ៍នេះបានកើតឡើងកាលពីរសៀលថ្ងៃទី៩ ខែឧសភា ឆ្នាំ២០២៣ នៅក្នុងតំបន់ឧស្សាហកម្ម (និគមរោចន៍) ស្ថិតក្នុងខេត្តអយុធ្យា ដែលរោងចក្រដ៏ធំនេះ គឺផលិតឧបករណ៍ប្រើប្រាស់ដែលធ្វើឡើងអំពីស្នោគ្រប់ប្រភេទ។

យោងតាមការផ្សាយរបស់ទូរទស្សន៍ប៉ុស្តិលេខ៨ របស់ថៃ បានបញ្ជាក់ថា ការឆាបឆេះរោងចក្រដ៏ធំនេះបានធ្វើអោយកម្មករក្នុងរោងចក្រជាច្រើននាក់រងរបួស ឯការផ្តើមអគ្គិភ័យនេះក៏មិនទាន់ដឹងពីមូលហេតុ ហើយក៏មិនទាន់ដឹងអំពីទំហំនៃការខូចខាតនៅឡើយ ដោយបច្ចុប្បន្នសមត្ថកិច្ចជំនាញកំពុងធ្វើការស្រាវជ្រាវ៕

អត្ថបទ៖ សោ និយមរ័ត្ន