ប្រតិបត្តិការវាយបករបស់អ៊ុយក្រែន ចាប់ផ្តើមហើយ

អ្នកឆ្លើយឆ្លងព័ត៌មានសង្គ្រាមរុស្ស៊ី Evgeny Poddubny បានរាយការណ៍កាលពីល្ងាចថ្ងៃព្រហស្បតិ៍ទី១១ខែឧសភាថា កងកម្លាំងអ៊ុយក្រែន បានវាយបំបែកខែលការពាររបស់រុស្ស៊ី នៅភាគពាយព្យទីក្រុង Artyomovsk ក្នុងតំបន់ Donbass ហើយដែលនេះ គឺជាការចាប់ផ្តើមនៃប្រតិបត្តិការវាយបកនិទាឃរដូវរបស់ទីក្រុងកៀវ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទន្ទឹមនោះ អ្នក​យក​ព័ត៌មាន​សង្គ្រាម​រុស្ស៊ី​ជាច្រើន​នាក់​ទៀត ​បានរាយការណ៍​ថា អ៊ុយក្រែន ​ទំនង​ជា​បើក​ការ​វាយ​ប្រហារ​ដំណាល​គ្នា​នៅ​ភាគ​ខាង​ជើង និង​ខាង​ត្បូង​ទីក្រុង Artyomovsk ឬ​គេ​ស្គាល់​ថា Bakhmut។ ទីក្រុង​នេះ ​ជា​កន្លែង​នៃ​ការ​ប្រយុទ្ធ​គ្នា​យ៉ាង​ខ្លាំងក្លា​រវាង​ទាហាន​រុស្ស៊ី និង​អ៊ុយក្រែន​អស់​រយៈពេល​ជាច្រើន​ខែមកហើយ។

លើសពីនេះ កងទ័ពទីក្រុងកៀវ ក៏បានប្រើប្រាស់រថក្រោះ ដើម្បីវាយប្រហារទីក្រុង Soledar ផងដែរ។ ចំណែកនៅក្នុងទីក្រុង Zaporozhye កងទ័ពអ៊ុយក្រែន បានវាយប្រហារទីតាំងរបស់រុស្ស៊ីនៅជិតទីក្រុង Guliay-Pole។

ទោះបីជាយ៉ាងណាក៏ដោយ កងទ័ពរុស្ស៊ី ជាមួយនឹងសព្វាវុធធុនធ្ងន់ ត្រូវបានគេឃើញកំពុងឆ្ពោះដំណើរទៅកាន់ព្រំដែនអ៊ុយក្រែននៅតំបន់ Belgorod។

មកទល់ពេលនេះ ទីក្រុងកៀវ មិន​បាន​ធ្វើ​អត្ថាធិប្បាយអ្វីទេលើប្រតិបត្តិការនេះ ប៉ុន្តែមុននេះ ប្រធានាធិបតីអ៊ុយក្រែន លោក វ្ល៉ាឌីមៀរ ហ្សេលេនស្គី បានអះអាងថា យោធារបស់លោកនៅតែត្រូវការពេលវេលាបន្ថែមទៀត ដើម្បីរៀបចំ មុនពេលបើកការវាយប្រហារ៕

ប្រែសម្រួល៖ Vann Vann

ប្រភព៖ RT

ចុចអាន៖ អ៊ុយក្រែន ថា ផែនការវាយលុកលើ រុស្ស៊ី មិនទាន់ចេញជាផ្លែផ្កានៅឡើយទេ