ព្យុះស៊ីក្លូន Mocha សម្លាប់មនុស្ស២៩នាក់ នៅមីយ៉ាន់ម៉ា និងបង់ក្លាដែស

ចំនួនអ្នកស្លាប់ដោយសារព្យុះស៊ីក្លូន Mocha ដែលបោកបក់កាត់ឈូងសមុទ្រ Bengal បានកើនឡើងដល់ ២៩ នាក់ហើយនៅក្នុងប្រទេសមីយ៉ាន់ម៉ា និងបង់ក្លាដែស គិតត្រឹមថ្ងៃចន្ទ ទី១៥ ខែឧសភា ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ព្យុះស៊ីក្លូន Mocha បានវាយប្រហារចន្លោះទីក្រុង Cox’s Bazar ក្នុងប្រទេសបង់ក្លាដែស និងទីក្រុង Sittwe នៃប្រទេសមីយ៉ាន់ម៉ា ដោយនាំមកជាមួយនូវខ្យល់បក់ខ្លាំងរហូតដល់១៩៥ គីឡូម៉ែត្រក្នុងមួយម៉ោង ហើយវាជាព្យុះធំបំផុតដែលវាយប្រហារលើឈូងសមុទ្រ Bengal ក្នុងរយៈពេលជាងមួយទសវត្សរ៍មកនេះ ។

ព្យុះនេះ បានវាយប្រហារពេញទំហឹងកាលពីល្ងាចថ្ងៃអាទិត្យ ដោយជះឥទ្ធិពលដល់ជំរំជនភៀសខ្លួន ដែលមានមនុស្សជិត ១ លាននាក់រស់នៅក្នុងប្រទេសបង់ក្លាដែស ។

ស្របពេលជាមួយគ្នានោះ យោធាមីយ៉ាន់ម៉ា និយាយថា ផ្ទះជាង ៨៦០ ខ្នង និងមន្ទីរពេទ្យ ឬគ្លីនិកចំនួន ១៤ កន្លែង ត្រូវរងការខូចខាតនៅទូទាំងប្រទេស ។

ព្យុះស៊ីក្លូន Mocha ក៏បានបង្កឲ្យមានបំណាក់ដីផងដែរ ហើយនាំមកនូវខ្យល់កន្ត្រាក់ដែលផ្តួលរំលំអង់តែនទូរស័ព្ទ នៅក្នុងទីក្រុង Sittwe។

យ៉ាងណាមិញ អង្គការសហប្រជាជាតិនិយាយថា ព្រោះតែបញ្ហាទំនាក់ទំនង ខ្លួនមិនទាន់អាចវាយតម្លៃការខូចខាតបានទេនៅក្នុងរដ្ឋរ៉ាក់ឃីន ជាកន្លែងដែលញាំញីដោយជម្លោះជនជាតិភាគតិចអស់រយៈពេលជាច្រើនឆ្នាំមកហើយ ។ 

គួរបញ្ជាក់ថា ព្យុះស៊ីក្លូន គឺជាការគំរាមកំហែងជាប្រចាំ និងសម្លាប់មនុស្សនៅឆ្នេរនៃមហាសមុទ្រឥណ្ឌាភាគខាងជើង ខណៈនៅឆ្នាំ ២០០៨ ព្យុះស៊ីក្លូន Nargis បានបំផ្លិចបំផ្លាញតំបន់ដីសណ្ដ Irrawaddy ក្នុងប្រទេសមីយ៉ាន់ម៉ា ដោយបានសម្លាប់មនុស្សយ៉ាងតិច ១៣៨ ០០០ នាក់ ៕

ប្រែសម្រួល៖ Vann Vann

ប្រភព៖ CNA

ចុចអាន៖ ព្យុះស៊ីក្លូន Mocha វាយប្រហារប្រទេស បង់ក្លាដែស និងមីយ៉ាន់ម៉ា ពេញទំហឹង