លោក ហ្សេលេនស្គី ថា កុមារអ៊ុយក្រែន ៥០០នាក់ ស្លាប់ក្នុងសង្គ្រាមរុស្ស៊ី

ប្រធានាធិបតីអ៊ុយក្រែន លោក វ្ល៉ាឌីមៀរ ហ្សេលេនស្គី បាននិយាយកាលពីថ្ងៃអាទិត្យទី៤ខែមិថុនាថា សង្គ្រាមរបស់រុស្ស៊ី ដែលឥឡូវនេះឈានចូលដល់ខែទី១៦ហើយនោះ បានសម្លាប់កុមារអ៊ុយក្រែនយ៉ាងតិច ៥០០នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហ្សេលេនស្គី បានផ្តល់តួលេខនេះ ប៉ុន្មានម៉ោង បន្ទាប់ពីក្រុមអ្នកជួយសង្គ្រោះ រកឃើញសាកសពក្មេងស្រីអាយុ២ឆ្នាំម្នាក់ ដែលបាត់បង់ជីវិតក្នុងការវាយប្រហារចុងក្រោយបង្អស់របស់រុស្ស៊ី។

លោកប្រធានាធិបតី បាននិយាយនៅក្នុងសេចក្តីថ្លែងការណ៍មួយថា “អាវុធ និងភាពស្អប់ខ្ពើមរបស់រុស្ស៊ី បានបន្តឆក់យក និងបំផ្លាញជីវិតកុមារអ៊ុយក្រែនជារៀងរាល់ថ្ងៃ។ រុស្ស៊ី បានសម្លាប់មនុស្សរាប់រយនាក់ តាំងពីការវាយលុករបស់រុស្ស៊ីលើអ៊ុយក្រែន ចាប់ផ្តើមនៅថ្ងៃទី២៤ខែកុម្ភៈឆ្នាំ២០២២”។

លោកបន្តថា “កុមារអ៊ុយក្រែនជាច្រើន អាចក្លាយជាអ្នកប្រាជ្ញ សិល្បករដ៏ល្បី និងជើងឯកកីឡា ដែលរួមចំណែកដល់ប្រវត្តិសាស្ត្រអ៊ុយក្រែន”។

ស្របពេលជាមួយគ្នានោះ លោក ហ្សេលេនស្គី និយាយថា វាមិនអាចទៅរួចទេ ក្នុងការបញ្ជាក់អំពីចំនួនពិតប្រាកដនៃកុមារដែលបានស្លាប់ ដោយសារអរិភាពកំពុងបន្ត ព្រោះតំបន់មួយចំនួនស្ថិតនៅក្រោមការកាន់កាប់របស់រុស្ស៊ី៕

ប្រែសម្រួល៖ Vann Vann

ប្រភព៖ CNA

ចុចអាន៖ អ៊ុយក្រែន ចាប់ផ្តើមការវាយលុកទ្រង់ទ្រាយធំ លើ រុស្ស៊ី