លោក ហ្សេលេនស្គី ៖ តាមពិតទៅ រុស្ស៊ី ដឹងខ្លួនហើយថានឹងចាញ់សង្គ្រាម អ៊ុយក្រែន

ប្រធានាធិបតីអ៊ុយក្រែនលោក វ៉ូឡូឌីមៀរ ហ្សេលេនស្គី បាននិយាយកាលពីថ្ងៃពុធថា តាមពិតទៅរុស្ស៊ីយល់ច្បាស់ហើយថា ពួកគេនឹងចាញ់សង្រ្គាមជាមួយអ៊ុយក្រែន បន្ទាប់ពីការបំផ្លាញទំនប់ Kakhovka ។

លោក ហ្សេលេនស្គី បាននិយាយនៅក្នុងបទសម្ភាសន៍ជាមួយកាសែតអាល្លឺម៉ង់ Bild ថា “រុស្ស៊ីបានធ្វើការបំផ្លាញទំនប់ Kakhovka ដោយសារពួកគេខ្លាចយើងនឹងចាប់ផ្តើមបើកការវាយលុកក្នុងទិសដៅនៃទីក្រុង Kherson ជាពិសេសពួកគេធ្វើបែបនេះ ដើម្បីឲ្យអ៊ុយក្រែនកាន់តែពិបាកក្នុងការរំដោះទឹកដីរបស់យើង ព្រោះរុស្ស៊ីដឹងច្បាស់ទៅហើយថា ពួកគេនឹងចាញ់សមរភូមិមួយនេះ” ។

ទោះយ៉ាងណាក៏ដោយ ប្រធានាធិបតីអ៊ុយក្រែនរូបនេះបានទទួលស្គាល់ថា ការបំផ្លិចបំផ្លាញទំនប់វារីអគ្គិសនីមួយនេះ ក៏នឹងធ្វើឲ្យប៉ះពាល់ដល់ប្រតិបត្តិការវាយលុកដែលរង់ចាំជាយូរមកហើយរបស់អ៊ុយក្រែនទៅលើរុស្ស៊ីផងដែរ ព្រោះបញ្ហាទឹកជន់លិច គឺមិនងាយស្រួលសម្រាប់កងកម្លាំងអ៊ុយក្រែនឡើយ ។

លោក ហ្សេលេនស្គី បញ្ជាក់ថា “អ្វីដែលកំពុងកើតឡើងនៅពេលនេះ គឺជាសោកនាដកម្ម ជាគ្រោះមហន្តរាយបរិស្ថាន និងមនុស្សជាតិ ហើយស្ថានភាពបែបនេះ វាមិនជួយយើងក្នុងការវាយលុកនោះទេ ជាពិសេសវានឹងធ្វើឲ្យប្រតិបត្តិការរបស់យើងកាន់តែលំបាក” ។

គួរបញ្ជាក់ថា រហូតមកដល់ពេលនេះ រុស្ស៊ី និងអ៊ុយក្រែនបានចោទប្រកាន់គ្នាទៅវិញទៅមក ពាក់ព័ន្ធនឹងការបំផ្លាញទំនប់ Kakhovka ដែលកំពុងបង្កឲ្យមានការជន់លិចលំនៅដ្ឋាន និងជម្លៀសប្រជាពលរដ្ឋរាប់ម៉ឺននាក់ចេញពីតំបន់រងផលប៉ះពាល់ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ យន្តហោះទម្លាក់គ្រាប់បែក ចិន-រុស្ស៊ី ហោះរួមគ្នាលើដែនទឹកជុំវិញ ជប៉ុន