និស្សិតសាកលវិទ្យាល័យនៅ ចិន កំពុងស្វែងរកការងារធ្វើ ស្របពេល​កំណើនសេដ្ឋកិច្ចធ្លាក់ចុះ

និស្សិតសាកលវិទ្យាល័យមួយចំនួនធំក្នុងប្រទេសចិនកំពុងព្យាយាមស្វែងរកការងារធ្វើ ខណៈដែលអត្រាអ្នកអត់ការងារធ្វើរបស់យុវជនមានការកើនឡើង ចំពេលដែលកំណើនសេដ្ឋកិច្ចធ្លាក់ចុះ ។

ទន្ទឹមនឹងនេះដែរ ប្រទេសចិនកំពុងមានចំនួននិស្សិតបញ្ចប់ការសិក្សាពីសាកលវិទ្យាល័យ ឬគ្រឹះស្ថានឧត្តមសិក្សាផ្សេងទៀត ដែលសរុបមានចំនួនប្រមាណ ១១ លាននាក់ ឬច្រើនជាងនេះគ្រាន់តែក្នុងខែឧសភា ។

ប៉ុន្តែអត្រាគ្មានការងារធ្វើសម្រាប់អ្នកដែលមានអាយុចន្លោះពី ១៦ ទៅ ២៤ ឆ្នាំនៅក្នុងតំបន់មួយចំនួនបានកើនឡើងដល់ ២០.៨ ភាគរយនៅក្នុងខែឧសភា ហើយនេះគឺជាតួលេខដ៏អាក្រក់បំផុត បើប្រៀបធៀបទៅនឹងទិន្នន័យដែលមាននៅក្នុងឆ្នាំ ២០១៨ ។

ពាក់ព័ន្ធនឹងបញ្ហានេះ សាកលវិទ្យាល័យនៅទូទាំងប្រទេសចិនកំពុងព្យាយាមជួយនិស្សិតស្វែងរកការងារដោយអនុញ្ញាតឲ្យមន្ត្រីក្រុមហ៊ុនធ្វើការសម្ភាសន៍ការងារនៅនឹងកន្លែងតែម្ដង ខណៈអាជីវកម្មប្រហែល ១០០ បានបង្កើតស្តង់សម្ភាសន៍នៅឯទីតាំងមួយចំនួនផងដែរក្នុងទីក្រុង Guangzhou ក្នុងខេត្ត Guangdong កាលពីថ្ងៃសៅរ៍ ។

និស្សិតផ្នែកវិទ្យាសាស្ត្រម្នាក់បាននិយាយថា គាត់ពិបាករកការងារធ្វើណាស់ ដោយសារតែ​ក្រុមហ៊ុន​ជា​ច្រើន​ហាក់​ដូច​ជា​មិន​មាន​ឆន្ទៈ​ក្នុង​ការ​ជួលបុគ្គលិកឡើយ ។

ចំណែកនិស្សិតផ្នែកហិរញ្ញវត្ថុម្នាក់ក៏បាននិយាយដែរថា ជាទូទៅក្រុមហ៊ុនមិនបានឆ្លើយតបអ្វីឡើយ នៅពេលដែលនាងដាក់ពាក្យសុំធ្វើការ ។ យ៉ាង​ហោច​ណាស់​នាង​សង្ឃឹម​ថា​ នឹង​ស្វែង​រក​កម្មសិក្សា​មួយ ទោះ​ជា​នាង​មិន​អាចធ្វើការងារនេះជា​អចិន្ត្រៃយ៍​ក៏​ដោយ ។

ទន្ទឹមនោះ អ្នកវិភាគនិយាយថា ប្រទេសចិនប្រឈមមុខនឹងអតុល្យភាពការងារ ដែលបណ្ដាលមកពីការកើនឡើងកម្រិតនៃសមិទ្ធិផលសិក្សា ខណៈដែលឧស្សាហកម្មដូចជា ការផលិតកំពុងប្រឈមនឹងការខ្វះខាតកម្លាំងពលកម្ម ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ បញ្ហាចំនួន ៣ ដែលលោក Blinken នឹងលើកយកមកពិភាក្សាជាមួយ ចិន