លោក Zelensky ថា ព្រោះតែលោកខាងលិច ទើប អ៊ុយក្រែន បរាជ័យវាយ​បកលើ រុស្ស៊ី

ប្រធានាធិបតីអ៊ុយក្រែនលោក Volodymyr Zelensky បានលើកឡើងកាលពីថ្ងៃអាទិត្យថា ប្រតិបត្តិការវាយបកដណ្ដើមយកទឹកដីរបស់រុស្ស៊ីខ្លះមកវិញពីសំណាក់កងម្លាំងទីក្រុងកៀវ ទទួលរងបរាជ័យ ដោយសារតែប្រទេសលោកខាងលិច ។

ថ្លែងទៅកាន់ប្រព័ន្ធផ្សព្វផ្សាយអេស្ប៉ាញ លោក Zelensky បានអះអាងថា “ប្រតិបត្តិការវាយបករបស់អ៊ុយក្រែនដែលបានធ្វើឡើងកាលពីដើមខែមិថុនា ត្រូវបានបំផ្លាញគ្មានសល់ ព្រោះតែកាំភ្លើងធំដែលផ្គត់ផ្គង់ដោយលោកខាងលិច មកដល់ទឹកដីអ៊ុយក្រែនយឺតពេលពេក” ។

លោក Zelensky បានឲ្យដឹងទៀតថា “យើង​បញ្ឈប់ប្រតិបត្តិការវាយបកទៅលើរុស្ស៊ី ​ព្រោះ​យើង​មិន​អាចមានសមត្ថភាពទៅមុខទៀតនោះទេ ដោយសារតែយើងមិនមានកាំភ្លើងធំដើម្បីបាញ់តតាំងជាមួយសត្រូវ ។ ទន្ទឹមនោះ មេដឹកនាំអ៊ុយក្រែនរូបនេះ ក៏នឹងត្រៀមបង្ហាញលទ្ធផលមិនទទួលបានផ្លែផ្កា នៅលើសមរភូមិប្រយុទ្ធមួយនេះផងដែរ មុនពេលមេដឹកនាំអង្គការណាតូកោះប្រជុំគ្នានៅទីក្រុងវីនីញូស ប្រទេសលីទុយអានី នាថ្ងៃទី១១ ខែកក្កដា” ។

ពាក់ព័ន្ធនឹងបញ្ហានេះ សារព័ត៌មាន Financial Times ក៏បានចុះផ្សាយដែរថា មន្ត្រីលោកខាងលិចមិនចាប់អារម្មណ៍ចំពោះការអនុវត្តរបស់អ៊ុយក្រែននៅលើសមរភូមិនេះឡើយ ។ ម្យ៉ាងទៀតការបន្តគាំទ្ររបស់លោកខាងលិចទៅលើរដ្ឋាភិបាលទីក្រុងកៀវក៏មើលទៅតាមកាលៈទេសៈផងដែរ ជាពិសេសលុះត្រាតែប្រតិបត្តិការវាយបករបស់អ៊ុយក្រែនទទួលបានជោគជ័យ ។

គួរបញ្ជាក់ថា អ៊ុយក្រែនបានបើកការវាយលុកទ្រង់ទ្រាយធំប្រឆាំងនឹងទីតាំងមួយចំនួនរបស់រុស្ស៊ីកាលពីថ្ងៃទី៤ ខែមិថុនា ប៉ុន្តែមិនបានសម្រេចគោលដៅណាមួយឡើយ ជាពិសេសការវាយលុកលើដីគោក ដោយសារតែផ្ទៃដីអ៊ុយក្រែនប្រមាណ ២០ ម៉ឺនគីឡូម៉ែត្រដែលគ្រប់គ្រងដោយកងកម្លាំងរុស្ស៊ីត្រូវបានដាក់ពង្រាយមីន ៕

ប្រែសម្រួលដោយ ៖ ជីវ័ន្ត

ប្រភព ៖ RT

ចុចអាន ៖ ធនាគារពិភពលោក ដឹងហើយថា លុយដែលឲ្យ អ៊ុយក្រែន ខ្ចី នឹងមិនបាន ត្រឡប់មកវិញឡើយ