វត្តមាននាវាមុជទឹកអាមេរិក នៅឧបទ្វីបកូរ៉េ ធ្វើឲ្យសង្គ្រាមនុយក្លេអ៊ែរ ជិតកើតឡើងមែនទែនហើយ

នៅថ្ងៃចន្ទទី១០ខែកក្កដា ប្រទេសកូរ៉េខាងជើង បានបរិហារទង្វើរបស់សហរដ្ឋអាមេរិក ក្នុងការដាក់នាវាមុជទឹកដើរដោយថាមពលនុយក្លេអ៊ែរ ទៅកាន់ដែនទឹកក្បែរឧបទ្វីបកូរ៉េ ដោយនិយាយថា រឿងនេះបង្កើតស្ថានភាពដែលនាំឲ្យជម្លោះនុយក្លេអ៊ែរ ខិតកាន់តែជិតក្លាយជាការពិតហើយ ។

ស្របពេលជាមួយគ្នានេះ កូរ៉េខាងជើងក៏បានអះអាងដែរថា យន្តហោះឈ្លបយកការណ៍របស់អាមេរិកនាពេលថ្មីៗនេះ បានរំលោភលើលំហអាកាសរបស់ខ្លួននៅជិតឆ្នេរសមុទ្រភាគខាងកើត។

យោងតាមការចុះផ្សាយរបស់កាសែត KCNA បានឲ្យដឹងថា ទង្វើរបស់សហរដ្ឋអាមេរិក ក្នុងការដាក់ទ្រព្យសម្បត្តិនុយក្លេអ៊ែរជាយុទ្ធសាស្ត្រ នៅឧបទ្វីបកូរ៉េ គឺជាការគំរាមកំហែងនុយក្លេអ៊ែរយ៉ាងម៉ឺងម៉ាត់ប្រឆាំងនឹងប្រទេសកូរ៉េខាងជើង និងបណ្តាប្រទេសក្នុងតំបន់ ហើយបង្ហាញពីការគំរាមកំហែងយ៉ាងធ្ងន់ធ្ងរដល់សន្តិភាព។

KCNA បានឲ្យដឹងទៀតថា “ស្ថានភាពធ្ងន់ធ្ងរកើតឡើងនៅក្នុងតំបន់ឧបទ្វីបកូរ៉េ គឺអាស្រ័យលើសកម្មភាពរបស់អាមេរិកនាពេលអនាគត ហើយទីក្រុងវ៉ាស៊ីនតោន នឹងទទួលខុសត្រូវទាំងស្រុងប្រសិនបើស្ថានការណ៍មិននឹកស្មានដល់ណាមួយ កើតឡើងមែននោះ”។

គួរបញ្ជាក់ជាថ្មី នាវាមុជទឹកដើរដោយថាមពលនុយក្លេអ៊ែររបស់អាមេរិក បានមកដល់កំពង់ផែ Busan នៃប្រទេសកូរ៉េខាងត្បូង ក្នុងខែមិថុនា បន្ទាប់ពីមេដឹកនាំកូរ៉េខាងត្បូង និងសហរដ្ឋអាមេរិកបានព្រមព្រៀងគ្នាកាលពីខែមេសាថា នាវាមុជទឹករបស់កងទ័ពជើងទឹកអាមេរិក នឹងធ្វើទស្សនកិច្ចនៅប្រទេសកូរ៉េខាងត្បូងជាលើកដំបូង ចាប់តាំងពីទសវត្សរ៍ឆ្នាំ ១៩៨០ មក ប៉ុន្តែមិនបង្ហាញពេលវេលាជាក់លាក់សម្រាប់ដំណើរទស្សនកិច្ចបែបនេះទេ។

ទន្ទឹមនោះ វាក៏ជាផ្នែកមួយនៃផែនការជំរុញការដាក់ពង្រាយទ្រព្យសម្បត្តិយុទ្ធសាស្ត្ររបស់អាមេរិក សំដៅឆ្លើយតបកាន់តែមានប្រសិទ្ធភាពចំពោះការគំរាមកំហែង និងការធ្វើតេស្តអាវុធរបស់កូរ៉េខាងជើង ដើម្បីការពារសម្ព័ន្ធមិត្តកូរ៉េខាងត្បូង ដូចដែលបានព្រមព្រៀងដោយមេដឹកនាំទាំងពីរ ៕

ប្រែសម្រួល៖ Vann Vann

ប្រភព៖ CNA