ក្រុមហ៊ុន OceanGate លុបគណនីប្រព័ន្ធផ្សព្វផ្សាយសង្គមទាំងអស់ ក្រោយ​សោកនាដកម្មផ្ទុះយាន Titan

ក្រុមហ៊ុន OceanGate ជាក្រុមហ៊ុនដំណើការយានជ្រមុជទឹក Titan ដែលទើបតែបង្កសោកនាដកម្មដ៏រន្ធត់ផ្ទុះស្លាប់មនុស្សចំនួន ៥ នាក់កាលពីខែមុននោះ បានលុបគណនីប្រព័ន្ធផ្សព្វផ្សាយសង្គមទាំងអស់របស់ខ្លួន រួមទាំងទំព័រ Twitter, Facebook និង Instagram ផងដែរ ។

គេហទំព័ររបស់ក្រុមហ៊ុនចុះទៅមើលខ្មោចកប៉ាល់ទីតានិកនៅបាតសមុទ្ររបស់សហរដ្ឋអាមេរិកមួយនេះបាននិយាយថា “ក្រៅតែពីការប្រកាសលុបគណនីប្រព័ន្ធផ្សព្វផ្សាយសង្គមរួចហើយ, ក្រុមហ៊ុន OceanGate ក៏បានផ្អាកប្រតិបត្តិការដំណើរកម្សាន្ត និងពាណិជ្ជកម្មទាំងអស់ផងដែរ” ។

គួររំឭកថា កាលពីខែមុន យានជ្រមុជទឹក Titan របស់ក្រុមហ៊ុន OceanGate ដែលផ្ទុកអ្នកដំណើរចំនួន ៥ នាក់បានបាត់បង់ទំនាក់ទំនងជាមួយកប៉ាល់មេ Polar Prince រយៈពេលជាង ១ ម៉ោង ក្រោយពេលចុះទៅបាតសមុទ្រដើម្បីធ្វើដំណើរទៅមើលខ្មោចកប៉ាល់ទីតានិកក្នុងមហាសមុទ្រអាត្លង់ទិកខាងជើង ។

ចំណែកមនុស្ស ៥ នាក់ដែលជិះនៅក្នុងយាន Titan រួមមាននាយកប្រតិបត្តិក្រុមហ៊ុន OceanGate លោក Stockton Rush, អ្នកជំនួញចក្រភពអង់គ្លេស Hamish Harding, អ្នកជំនាញផ្នែកសមុទ្របារាំងលោក Paul-Henri Nergeolet និងអនុប្រធានសាជីវកម្ម Engro របស់ប្រទេសប៉ាគីស្ថានលោក Shahzada Dawood ជាមួយកូនប្រុសអាយុ ១៩ ឆ្នាំឈ្មោះ Suleman ។

ប៉ុន្តែទោះជាយ៉ាងណា ក្រោយមកក្នុងខែមិថុនា ឆ្មាំឆ្នេរសមុទ្រអាមេរិក បានបញ្ជាក់ថា កម្ទេចកម្ទីដែលបានរកឃើញនៅបាតសមុទ្រ ក្បែរខ្មោចកប៉ាល់ទីតានិក គឺជាបំណែកនៃយានជ្រមុជទឹក Titan ខណៈមនុស្ស ៥ នៅក្នុងយាននោះគឺត្រូវបានគេសន្មត់ថាស្លាប់ទាំងអស់ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ៣ ចំណុចសំខាន់ៗអំពីរឿងរ៉ាវគ្រាប់បែកចង្កោមដែល អាមេរិក ផ្ដល់ទៅឲ្យ អ៊ុយក្រែន