អាមេរិក ដាក់ទណ្ឌកម្មបន្ថែមទៀតលើកម្មវិធីអាវុធរបស់ កូរ៉េខាងជើង

រដ្ឋាភិបាលសហរដ្ឋអាមេរិកបានប្រកាសដាក់ទណ្ឌកម្មបន្ថែមទៀតកូរ៉េខាងជើងដើម្បីជាការឆ្លើយតបទៅនឹងការប៉ុនប៉ងលើកទី ២ របស់រដ្ឋាភិបាលទីក្រុងព្យុងយ៉ាងក្នុងការបាញ់បង្ហោះផ្កាយរណបឈ្លបយកការណ៍ទៅកាន់តារាវិថីកាលពីសប្តាហ៍មុន ។

ក្រសួងរតនាគារសហរដ្ឋអាមេរិកបាននិយាយនៅក្នុងសេចក្តីថ្លែងការណ៍មួយកាលពីថ្ងៃព្រហស្បតិ៍ថា សហរដ្ឋអាមេរិកបានបន្ថែមក្រុមហ៊ុន ​និងបុគ្គល ២ រូបចូលទៅក្នុងបញ្ជីដាក់ទណ្ឌកម្មរបស់ខ្លួន ជុំវិញការគាំទ្ររបស់ពួកគេសម្រាប់កម្មវិធីអាវុធរបស់កូរ៉េខាងជើង ខណៈទណ្ឌកម្មនោះរួមមានការបង្កកទ្រព្យសម្បត្តិជាដើម ។

សេចក្តីថ្លែងការណ៍បាននិយាយទៀតថា បុគ្គល​ទាំង​ពីរ​នាក់​នោះ ម្នាក់​ជា​មន្ត្រី​នៃ​គណបក្ស​ពលករ​កូរ៉េ​ខាង​ជើងរស់នៅ​ប្រទេស​រុស្ស៊ី និង​ម្នាក់ទៀតជា​បុរសជនជាតិ​រុស្ស៊ី ខណៈក្រុមហ៊ុនកូរ៉េខាងជើងដែលជាប់ក្នុងបញ្ជីទណ្ឌកម្មរបស់អាមេរិក គឺជាក្រុមហ៊ុនសំណង់ដែលគ្រប់គ្រងដោយរុស្ស៊ី ។

ក្រសួងរតនាគារអាមេរិកបញ្ជាក់ថា បុរសទាំងនោះបានសហការគ្នាដើម្បីផ្តល់មូលនិធិដល់កម្មវិធីសព្វាវុធរបស់ទីក្រុងព្យុងយ៉ាង តាមរយៈវិធីសាស្រ្តដូចជា ការជួលកម្មករសំណង់កូរ៉េខាងជើងនៅក្នុងប្រទេសរុស្ស៊ី ហើយការដាក់ទណ្ឌកម្មនេះ គឺសំដៅលើកម្មវិធីមីស៊ីលផ្លោង និងសព្វាវុធផ្សេងទៀតរបស់កូរ៉េខាងជើង ដែលបំពានលើដំណោះស្រាយរបស់ក្រុមប្រឹក្សាសន្តិសុខអង្គការសហប្រជាជាតិ ។

ពាក់ព័ន្ធនឹងបញ្ហានេះដែរ សហរដ្ឋអាមេរិកនឹងបន្តធ្វើការយ៉ាងជិតស្និទ្ធជាមួយកូរ៉េខាងត្បូង និងជប៉ុនក្នុងកិច្ចខិតខំប្រឹងប្រែងរួមគ្នារបស់ប្រទេសទាំងបី ដើម្បីប្រយុទ្ធប្រឆាំងនឹងសកម្មភាពខុសច្បាប់ និងការបំផ្លិចបំផ្លាញណាមួយពីសំណាក់ប្រទេសកូរ៉េខាងជើង ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ កូរ៉េខាងជើង ចាប់ផ្តើមហាត់បាញ់នុយក្លេអ៊ែរលើកូរ៉េខាងត្បូង