រដូវរងានៅ វៀតណាម ឆ្នាំនេះនឹងមានសីតុណ្ហភាពត្រជាក់តិចតួចប៉ុណ្ណោះ

ក្រុមអ្នកជំនាញអាកាសធាតុបានព្យាករណ៍ថា តំបន់ភាគខាងជើង និងភាគកណ្តាលរបស់ប្រទេសវៀតណាមនឹងមានអាកាសធាតុត្រជាក់តិចតួចបំផុតសម្រាប់រដូវរងាក្នុងឆ្នាំនេះ ដោយសារបាតុភូតអាកាស El Nino បង្កើនសីតុណ្ហភាពជាមធ្យមខ្ពស់ជាងឆ្នាំមុនៗ ។

លោក Nguyen Van Huong ប្រធាននាយកដ្ឋានព្យាករណ៍អាកាសធាតុនៅមជ្ឈមណ្ឌលជាតិសម្រាប់ការព្យាករណ៍ឧតុនិយមបានប្រាប់ទីភ្នាក់ងារសារព័ត៌មានវៀតណាម (VNA) ថា សីតុណ្ហភាពជាមធ្យមនៅទូទាំងប្រទេសក្នុងខែនេះ បានកើនឡើងខ្ពស់ជាងកម្រិតមធ្យមពី ០.៥ ទៅ ១ អង្សាសេ ។

ស្របពេលជាមួយគ្នានេះ លោក Van Huong បានអះអាងថា នៅក្នុងខែវិច្ឆិកា និងខែធ្នូ ដែលជាខែឈានចូលរដូវរងាសម្រាប់ប្រទេសវៀតណាម សីតុណ្ហភាពត្រូវបានព្យាករណ៍នឹងកើនឡើងខ្ពស់ជាងធម្មតាពី ០.៥ ទៅ ១.៥ អង្សាសេ ។

អ្នកជំនាញរូបនេះបញ្ជាក់ទៀតថា រដូវរងានៅវៀតណាមក្នុងឆ្នាំនេះនឹងភាពត្រជាក់តិចតួចប៉ុណ្ណោះ ហើយរយៈពេលក៏ខ្លីជាងកំណត់ត្រានៃឆ្នាំមុនៗផងដែរ នោះក៏ដោយសារតែផលប៉ះពាល់នៃបាតុភូតអាកាសធាតុ El Nino ដែលបង្កការរំខានជាបន្តបន្ទាប់នៅជុំវិញពិភពលោក ។

គួរបញ្ជាក់ថា នៅប្រទេសវៀតណាម ជាធម្មតារដូវរងានឹងចូលមកដល់តំបន់ភាគខាងជើង និងភាគកណ្តាលក្នុងខែវិច្ឆិកា ហើយមានរយៈពេលរហូតដល់ខែមីនា ។ ប៉ុន្តែអ្នកឧតុនិយមមួយចំនួនមិនប្រាកដប្រជាថា តើរដូវរងានៅវៀតណាមឆ្នាំនេះនឹងចាប់ផ្ដើម ក៏ដូចជាបញ្ចប់នៅខែណានោះទេ ខណៈតំបន់ជាច្រើននៅទូទាំងផែនដីបានឃើញរួចទៅហើយនូវវដ្ដរដូវដ៏គួរឲ្យភ្ញាក់ផ្អើល និងមិនអាចទាយទុកជាមុនបានទាំងការចាប់ផ្ដើម និងបញ្ចប់នៃបាតុភូត El Nino នេះ ៕

ប្រែសម្រួលដោយ ៖ ជីវ័ន្ត

ប្រភព ៖ VN Express

ចុចអាន ៖ លោក Zelensky កំពុងភ័យខ្លួនថា លោកខាងលិច ប្រហែលទុក អ៊ុយក្រែន ចោលហើយ ព្រោះតែជម្លោះ អ៊ីស្រាអែល-ប៉ាឡេស្ទីន