ក្រុមហ៊ុនអាកាសចរណ៍ធំមួយរបស់វៀតណាមផ្អាកជើងហោះហើរទៅកាន់ប្រទេសជាច្រើន

ក្រុមហ៊ុនអាកាសចរណ៍ Bamboo Airways កាលពីថ្ងៃអាទិត្យបានប្រកាសផ្អាកជើងហោះហើរអន្តរជាតិចំនួន ១០ ទៅកាន់គោលដៅអាស៊ី និងអឺរ៉ុប ដើម្បីធានាបាននូវធនធាន និងផ្ដល់ប្រសិទ្ធភាពសម្រាប់ប្រតិបត្តិការហោះហើរក្រោយៗទៀត ។

ក្រុមហ៊ុនអាកាសចរណ៍មួយនេះបានប្រកាសនៅលើទំព័រហ្វេសប៊ុកផ្លូវការរបស់ខ្លួនថា ក្រុមហ៊ុនបានចាប់ផ្តើមផ្អាកជើងហោះហើររវាងទីក្រុងហាណូយ និងទីក្រុង Incheon របស់ប្រទេសកូរ៉េខាងត្បូង ចាប់ពីថ្ងៃអាទិត្យមកម្ល៉េះ ។

ចំណែកជើងហោះហើរពីទីក្រុងហូជីមិញទៅកាន់ប្រទេសសិង្ហបុរី ទីក្រុងស៊ីដនី និងទីក្រុងមែលប៊នរបស់អូស្ត្រាលី នឹងត្រូវផ្អាកចាប់ពីថ្ងៃទី៤ ខែវិច្ឆិកា ខណៈដែលសេវាកម្មផ្លូវអាកាសពីទីក្រុងហូជីមិញ និងហាណូយទៅកាន់ទីក្រុង Frankfurt របស់អាល្លឺម៉ង់ ក៏នឹងត្រូវផ្អាកនៅថ្ងៃតែមួយនោះ ។

ដូចគ្នានេះដែរ ការហោះហើរពីទីក្រុងហាណូយទៅកាន់ទីក្រុងបាងកក ទីក្រុងណារីតារបស់ជប៉ុន និងតៃប៉ិរបស់តៃវ៉ាន់ នឹងត្រូវផ្អាក ចាប់ពីថ្ងៃទី៨ ខែវិច្ឆិកា ចំណែកពីទីក្រុងហូជីមិញទៅទីក្រុងបាងកករបស់ថៃ នឹងដំណើរការចាប់ពីថ្ងៃទី២១ ខែវិច្ឆិកា ប៉ុន្តែសម្រាប់ការហោះហើរ​ក្នុងស្រុកវិញ ក្រុមហ៊ុននៅតែរក្សាប្រតិបត្តិការធម្មតាដដែរ ។

ស្របពេលជាមួយគ្នានេះ ក្រុមហ៊ុនក៏បានផ្ដល់សំណងជាទឹកប្រាក់ និងផ្លាស់ប្ដូរជើងហោះហើរជូនទៅដល់អតិថិជនដែលបានទិញ ក៏ដូចជាកក់សំបុត្រទុកមុនរួចហើយផងដែរ ៕

ប្រែសម្រួល៖ នាង រតនៈ

ប្រភព៖​ VN Express