អ៊ីស្រាអែល យល់ព្រមផ្អាកបាញ់ ៤ម៉ោងក្នុងមួយថ្ងៃ នៅភាគខាងជើងតំបន់ ហ្គាហ្សា

អ្នកនាំពាក្យក្រុមប្រឹក្សាសន្តិសុខជាតិអាមេរិក លោក John Kirby និយាយថា ប្រទេសអ៊ីស្រាអែល នឹងចាប់ផ្តើមអនុវត្តការផ្អាកបាញ់រយៈពេល៤ម៉ោងជារៀងរាល់ថ្ងៃ នៅភាគខាងជើងតំបន់ ហ្គាហ្សា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះបីជាយ៉ាងណាក៏ដោយ រដ្ឋមន្ត្រីការពារជាតិអ៊ីស្រាអែល បានសង្កត់ធ្ងន់ថា នេះគ្រាន់តែជា វិធានការក្នុងតំបន់ប៉ុណ្ណោះ ដែលនឹងមិនជះឥទ្ធិពលដល់ការប្រយុទ្ធគ្នាក្នុងសង្គ្រាមនោះទេ។

ស្របពេលជាមួយគ្នានោះ លោកប្រធានាធិបតី ចូ បៃដិន ក៏និយាយដែរថា នឹងមាន “ច្រកមនុស្សធម៌” ចំនួនពីរ ដែលអនុញ្ញាតឲ្យមនុស្សចាកចេញពីតំបន់ប្រយុទ្ធ។

លោក បៃដិន បន្តថា សហរដ្ឋអាមេរិក កំពុងព្យាយាមបង្កើនការផ្គត់ផ្គង់មនុស្សធម៌ និងជំនួយដល់តំបន់ហ្គាហ្សា។ លោក​ក៏​ចង់​ឲ្យរថយន្ត​ជំនួយ​ចូល​ក្នុង​ទឹកដីនោះ ឲ្យបាន១៥០គ្រឿង​ក្នុង​មួយ​ថ្ងៃផងដែរ។

យ៉ាងណា តាមការបញ្ជាក់ពីអង្គការសហប្រជាជាតិ, បរិមាណនៃជំនួយដែលចូលទៅតំបន់ហ្គាហ្សា គឺគ្រាន់តែបំពេញតម្រូវការរបស់ប្រជាជនត្រឹមមួយផ្នែកតូចប៉ុណ្ណោះ ហើយស្ថានភាពមនុស្សធម៌គឺ កាន់តែយ៉ាប់យ៉ឺនទៅៗ។

អ៊ីស្រាអែល ​បាន​ទម្លាក់​គ្រាប់បែក​លើ​តំបន់​ហ្គាហ្សា​អស់​រយៈពេល​ជាង​មួយ​ខែមក​ហើយ ហើយ​បាន​ចាប់ផ្តើម​ការវាយលុក​ដ៏ធំ​មួយ​កាលពី​ជិត​ពីរ​សប្តាហ៍​មុន ​ក្នុង​គោលបំណង​កម្ទេច​ក្រុម​ហាម៉ាស ដែល​សហរដ្ឋអាមេរិក និង​មហាអំណាច​លោកខាងលិច​ផ្សេងទៀត ​ចាត់ទុក ​ជា​អង្គការ​ភេរវកម្ម។

សង្រ្គាមបានចាប់ផ្តើម បន្ទាប់ពីខ្មាន់កាំភ្លើងក្រុមហាម៉ាស បើកការវាយលុកឆ្លងដែនយ៉ាងភ្ញាក់ផ្អើលបំផុតលើភាគខាងត្បូងប្រទេសអ៊ីស្រាអែល កាលពីថ្ងៃទី៧ខែតុលា ដែលក្នុងនោះ មនុស្ស១៤០០នាក់ត្រូវបានសម្លាប់ និង២៤០នាក់ទៀត ត្រូវចាប់ធ្វើជាចំណាប់ខ្មាំង។

ដោយឡែក ក្រសួងសុខាភិបាលដែលគ្រប់គ្រងដោយក្រុមហាម៉ាសនៅតំបន់ហ្គាហ្សា និយាយថា មនុស្សប្រមាណ១០៨០០នាក់ត្រូវបានសម្លាប់នៅក្នុងទឹកដីនេះ ចាប់តាំងពីពេលនោះមក ខណៈ១.៥លាននាក់ បានភៀសខ្លួនចេញពីផ្ទះសម្បែង៕

ប្រែសម្រួល៖ Vann Vann

ប្រភព៖ BBC

ចុចអាន៖ ហាម៉ាស កំពុងចរចាជាមួយ អ៊ីស្រាអែល រឿងដោះលែងចំណាប់ខ្មាំង ជាងថ្នូរនឹងបទឈប់បាញ់