អ៊ីរ៉ង់ ផ្ដាំទៅ អ៊ីស្រាអែល ប្រយ័ត្នខ្លួនឲ្យមែនទែន ក្រោយការទម្លាក់គ្រាប់បែក​សម្លាប់ឧត្តមសេនីយ៍កំពូលនៅ ស៊ីរី

អ៊ីរ៉ង់បានព្រមានទៅដល់អ៊ីស្រាអែលប្រយ័ត្នខ្លួនឲ្យមែនទែន បន្ទាប់ពីការវាយប្រហារទម្លាក់គ្រាប់បែកតាមអាកាសសម្លាប់ទីប្រឹក្សាជាន់ខ្ពស់របស់ឆ្មាំបដិវត្តន៍អ៊ីរ៉ង់ (IRGC) លោកឧត្តមសេនីយ៍ Sayyed Razi Mousavi នៅជិតរដ្ឋធានីដាម៉ាសរបស់ប្រទេសស៊ីរីកាលពីថ្ងៃចន្ទកន្លងទៅ ។

រដ្ឋមន្ត្រីការបរទេសអ៊ីរ៉ង់លោក Hossein Amir-Abdollahian បាននិយាយនៅក្នុងសេចក្តីថ្លែងការណ៍មួយដែលបានបង្ហោះនៅលើគណនី X កាលពីល្ងាចថ្ងៃអង្គារថា “លោកឧត្តមសេនីយ៍ Mousavi គឺជាទីប្រឹក្សាយោធាអ៊ីរ៉ង់មួយរូបដែលមានសមត្ថភាពប្រយុទ្ធប្រឆាំងនឹងអំពើភេរវកម្មនៅក្នុងប្រទេសស៊ីរី ដូច្នេះអ៊ីស្រាអែលត្រូវតែសងរាល់ការបាត់បង់របស់យើងនៅពេលនេះ” ។

រដ្ឋមន្ត្រីការបរទេសរូបនេះបញ្ជាក់ទៀតថា លោក Mousavi គឺជាដៃគូដ៏ជិតស្និទ្ធរបស់លោកឧត្តមសេនីយ Qassem Soleimani មេបញ្ជាការកងកម្លាំង Quds ហើយអ្នកទាំងពីរសុទ្ទសឹងតែជាឥស្សរជនជាន់ខ្ពស់ដែលបានធានាទាំងសន្តិសុខក្នុងប្រទេសអ៊ីរ៉ង់ និងក្នុងតំបន់មជ្ឈិមបូព៌ាផងដែរ ។

នេះគឺជាការស្លាប់បាត់បង់ជីវិតរបស់មន្ត្រីជាន់ខ្ពស់អ៊ីរ៉ង់ទី ២ ហើយនៅខាងក្រៅប្រទេសរបស់ខ្លួន ចាប់តាំងពីលោក Soleimani ត្រូវបានធ្វើឃាតនៅក្នុងការវាយប្រហារដោយយន្តហោះគ្មានមនុស្សបើករបស់សហរដ្ឋអាមេរិកនៅទីក្រុងបាដាដប្រទេសអ៊ីរ៉ាក់កាលពីខែមករា ឆ្នាំ២០២០ ។

ទន្ទឹមនោះ ការស្លាប់របស់ទីប្រឹក្សាជាន់ខ្ពស់រូបនេះកើតមានឡើង ចំពេលមានការវាយប្រហារជាហូរហែក្នុងរយៈពេលប៉ុន្មានសប្ដាហ៍ថ្មីៗនេះលើបន្ទាយទ័ពអាមេរិក និងអ៊ីស្រាអែលទាំងនៅអ៊ីរ៉ាក់ និងស៊ីរីដែលសុទ្ធសឹងតែមានទំនាក់ទំនងជាមួយក្រុមប្រដាប់អាវុធគាំទ្រដោយអ៊ីរ៉ង់នៅក្នុងប្រទេសអ៊ីរ៉ាក់ ។

ស្របពេលជាមួយគ្នានេះ ការវាយប្រហារសម្លាប់លោក Mousavi ក៏កើតមានឡើង ស្របពេលដែលតំបន់មជ្ឈិមបូព៌ាក៏កំពុងផ្ទុះសង្គ្រាមរវាងអ៊ីស្រាអែល និងក្រុមហាម៉ាសផងដែរ ហើយប្រសិនបើអ៊ីរ៉ង់បើកការសងសឹកណាមួយនោះ ប្រាកដណាស់ថា ជម្លោះនៅតំបន់មួយនេះនឹងកាន់តែវឹកវរ ខណៈចាប់តាំងពីព្រឹត្តិការណ៍ ៧ តុលាមក មានអ្នកស្លាប់បាត់បង់ជីវិតរាប់ម៉ឺននាក់ទៅហើយ ។

គួរបញ្ជាក់ថា អ៊ីស្រាអែលបានបើកការវាយប្រហារតាមផ្លូវអាកាស និងដីគោកលើតំបន់ហ្គាហ្សាស្ទ្រីប ជាការសងសឹកចំពោះការវាយឆ្មក់របស់ក្រុមហាម៉ាស ដោយបានសម្លាប់ជនជាតិប៉ាឡេស្ទីនជិត ២១,០០០ នាក់ហើយ ដែលភាគច្រើនជាកុមារ និងស្ត្រី និងជាង ៥៤,០០០ នាក់ផ្សេងទៀតរងរបួស ។ ចំណែកខាងអ៊ីស្រាអែលវិញមានមនុស្សជិត ១,២០០ បានបាត់បង់ជិវិត ខណៈចំណាប់ខ្មាំងជាង ១៣០ នាក់នៅតែស្ថិតក្នុងកណ្ដាប់ដៃក្រុមហាម៉ាសដដែល ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ អ៊ីស្រាអែល ទម្លាក់គ្រាប់បែកសម្លាប់ឧត្តមសេនីយ៍កំពូលមួយរូបរបស់ អ៊ីរ៉ង់ ប្រចាំនៅ ស៊ីរី