នាវាចម្បាំង អាមេរិក បាញ់ទម្លាក់យន្តហោះគ្មានមនុស្សបើក និងមីស៊ីល​របស់ក្រុមហ៊ូធីនៅសមុទ្រក្រហម

នាវាចម្បាំងរបស់សហរដ្ឋអាមេរិកមួយគ្រឿងប្រភេទ USS Mason DDG 87 បានបាញ់ទម្លាក់យន្តហោះគ្មានមនុស្សបើក និងមីស៊ីលប្រឆាំងនាវាដែលបាញ់ប្រហារដោយក្រុមឧទ្ទាមហ៊ូធីគាំទ្រដោយប្រទេសយេម៉ែននៅភាគខាងត្បូងសមុទ្រក្រហម ។

បញ្ជាការកណ្តាលអាមេរិក (CENTCOM) បាននិយាយនៅក្នុងសេចក្តីថ្លែងការណ៍មួយថា “”ក្នុងការបាញ់បោះនេះគឺមិនមានផលប៉ះពាល់ ឬការខូចខាតណាមួយដល់កប៉ាល់ក្នុងតំបន់ទាំង ១៨ គ្រឿងឡើយ ជាពិសេសក៏មិនមានអ្នករងរបួសនោះដែរ ហើយនេះវាគឺជាការប៉ុនប៉ងវាយប្រហារលើកទី ២២ ហើយរបស់ក្រុមហ៊ូធីលើការដឹកជញ្ជូនជាអន្តរជាតិ ចាប់តាំងពីពាក់កណ្តាលខែតុលាមក” ។

ទន្ទឹមនោះ ការវាយប្រហារជាហូរហែកន្លងមកនេះក៏បង្កផលប៉ះពាល់ដល់ពាណិជ្ជកម្មពិភពលោកប្រមាណ ១២ ភាគរយផងដែរ ខណៈក្រោយឃើញស្ថានការណ៍កាន់តែវឹកវរបែបនេះ ទើបជំរុញឲ្យសហរដ្ឋអាមេរិកបង្កើតក្រុមការងារកងទ័ពជើងទឹកចម្រុះជាតិសាសន៍នៅដើមខែនេះ ដើម្បីការពារការដឹកជញ្ជូននៅផ្លូវទឹករបស់សមុទ្រក្រហម ។

ក្រុមហ៊ូធីបានដាក់មុខព្រួញម្តងហើយម្តងទៀតលើនាវាដឹកជញ្ជូននៅសមុទ្រក្រហម ដើម្បីបង្ហាញកិច្ចគាំទ្រទៅដល់ពលរដ្ឋតំបន់ហ្គាហ្សា ក៏ដូចជាក្រុមប្រដាប់អាវុធប៉ាឡេស្ទីនហាម៉ាសដែលកំពុងជាប់ដៃតតាំងជាមួយការវាយសន្ធាប់ពីកងកម្លាំងអ៊ីស្រាអែល ជាពិសេសគឺដើម្បីកុំឲ្យជម្លោះមួយនេះកាន់តែរីកសាយភាយ ។

គួរបញ្ជាក់ថា អ៊ីស្រាអែលបានបើកការវាយប្រហារតាមផ្លូវអាកាស និងដីគោកលើតំបន់ហ្គាហ្សាស្ទ្រីប ជាការសងសឹកចំពោះការវាយឆ្មក់របស់ក្រុមហាម៉ាសក្នុងព្រឹត្តិការណ៍ ៧ តុលា ដោយបានសម្លាប់ជនជាតិប៉ាឡេស្ទីនដល់ ២១,១១០ នាក់ហើយ ដែលភាគច្រើនជាកុមារ និងស្ត្រី និងជាង ៥៥,២០០ នាក់ផ្សេងទៀតរងរបួស ។ ចំណែកខាងអ៊ីស្រាអែលវិញមានមនុស្សជិត ១,២០០ បានបាត់បង់ជិវិត ខណៈចំណាប់ខ្មាំងជាង ១៣០ នាក់នៅតែស្ថិតក្នុងកណ្ដាប់ដៃក្រុមហាម៉ាសដដែល ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ អាមេរិក ដឹកយន្តហោះ និងកប៉ាល់ ២៥០ គ្រឿងទៅ អ៊ីស្រាអែល ចំពេលមាន សង្គ្រាមនៅហ្គាហ្សា