ដើមឆ្នាំ ២០២៤ ក្រុមហ៊ុនយក្សមួយទៀតរបស់ប្រទេសចិន ប្រកាសក្ស័យធន

ជារឿងដ៏ភ្ញាក់មួយសម្រាប់ដើមឆ្នាំ ២០២៤ នេះ ដោយក្រុមហ៊ុនវិស័យធនាគារ និងអចលនទ្រព្យឈានមុខគេមួយរបស់ប្រទេសចិន Zhongzhi Enterprise Group ត្រូវបានគេទម្លាយថា បានដាក់ពាក្យក្ស័យធន ដោយសារតែវិបត្តិហិរញ្ញវត្ថុ មិនអាចស៊ូទ្រាំជាមួយបំណុលធនាគារ។

ជាមួយគ្នានេះ យោងតាមទីភ្នាក់ងារព័ត៌មាន Reuters បានឱ្យដឹងថា ក្រុមហ៊ុន Zhongzhi Enterprise Group (ZEG) ដែលជាក្រុមហ៊ុនគ្រប់គ្រងផ្នែកធនាគារ និងអចលទ្រព្យដ៏ធំមួយ បានដាក់ពាក្យក្ស័យធន មូលហេតុគឺមកពីក្រុមហ៊ុននេះជាប់បំណុលច្រើនលើសលប់ ម្យ៉ាងទៀតទ្រព្យសម្បត្តិសរុបរបស់ក្រុមហ៊ុនបច្ចុប្បន្ន មិនអាចគ្រប់គ្រាន់ក្នុងការសងបំណុលឡើយ។ កាលពីថ្ងៃសុក្រ ម្សិលមិញនេះ តុលាការនៅទីក្រុងប៉េកាំង (ប្រទេសចិន) ក៏បានទទួលយកពាក្យសុំក្ស័យធនរបស់ Zhongzhi Enterprise Group រួចហើយដែរ យោងទៅតាមបទប្បញ្ញត្តិស្តីពីការក្ស័យធនរបស់ក្រុមហ៊ុន។

ប្រភពបានឱ្យដឹងទៀតថា Zhongzhi Enterprise Group បានជួបវិបត្តិហិរញ្ញវត្ថុនៅក្នុងខែកក្កដា ឆ្នាំ ២០២៣ នៅពេលដែលក្រុមហ៊ុន Zhongrong International Trust ដែលជាក្រុមហ៊ុនបុត្រសម្ព័នដ៏ធំមួយរបស់ខ្លួន មិនបានបង់ប្រាក់សម្រាប់ការវិនិយោគ។ ហើយគេក៏ដឹងទៀតថា ក្រុមហ៊ុននេះបានផ្ដល់ប្រាក់កម្ចីឱ្យទៅក្រុមហ៊ុនអភិវឌ្ឍអចលនទ្រព្យផ្សេងៗក្នុងប្រទេសចិន រហូតដល់ក្រុមហ៊ុនទាំងនោះក្ស័យធន មិនមានលទ្ធភាពសងប្រាក់ត្រឡប់មកវិញ ។

កាល​ពី​​ក្នុង​ខែ​វិច្ឆិកា Zhongzhi Enterprise Group ​បាន​សូមទោស​ដល់អ្នក​វិនិយោគ ហើយ​បាន​សារភាព​ថា​ខ្លួន​មិន​អាច​សង​បំណុលដែលមាន​រហូត​ដល់ ៦៤ ពាន់​លាន​ដុល្លារ​អាមេរិក ​បានឡើយ។

ទន្ទឹមគ្នានេះដែរ ប៉ូលីសក្រុងប៉េកាំងក៏បានបើកការស៊ើបអង្កេតលើការសង្ស័យថា Zhongzhi Enterprise Group អាចជាប់ពាក់ព័ន្ធនឹងសកម្មភាពខុសច្បាប់ណាមួយ ហើយមនុស្សជាច្រើននាក់ក្នុងក្រុមហ៊ុនក៏ត្រូវបានប៉ូលិសសង្ស័យដូចគ្នាដែរ។

សូមជម្រាបផងដែរថា Zhongzhi Enterprise Group ត្រូវបានគេស្គាល់ថាជាក្រុមហ៊ុនដ៏ធំមួយនៅក្នុងវិស័យធនាគារដែលមានតម្លៃរហូតដល់ ៣ ពាន់ពាន់លានដុល្លារអាមេរិក ។ ករណីរបស់ Zhongzhi បានបង្កើតឱ្យការព្រួយបារម្ភយ៉ាងខ្លាំងថា វិបត្តិបំណុលក្នុងប្រទេសចិន អាចរីករាលដាលដល់វិស័យហិរញ្ញវត្ថុក្នុងប្រទេសទាំងមូល ។ Zhongzhi មិនមែនជាក្រុមហ៊ុនយក្សដំបូងរបស់ចិនដែលប្រកាសក្ស័យធនឡើយ តួយ៉ាងកាលពីក្នុងឆ្នាំ ២០២៣ ក្រុមហ៊ុនយក្សលំដាប់ថ្នាក់លេខទី២ ផ្នែកអចលនទ្រព្យរបស់ប្រទេសចិន Evergrande បានប្រកាសក្ស័យធន ហើយឆ្នាំដំណាលគ្នានោះក្រុមហ៊ុនអភិវឌ្ឍន៍អចលនទ្រព្យ Country Garden ក៏បានប្រកាសសក្ស័យធនដែរ ៕

ប្រែសម្រួលដោយ៖ កុសល
ប្រភព៖ Zing, BBC