អាមេរិក បង្ហាញមុខ អ្នកសម្លាប់កងទ័ពខ្លួន ក្នុងប្រទេស ហ្ស៊កដានី

BBC ចុះផ្សាយកាលពីថ្ងៃពុធទី៣១ខែមករាថា សហរដ្ឋអាមេរិក បានបង្ហាញមុខក្រុមដែលនៅពីក្រោយការវាយប្រហារក្នុងប្រទេសហ្ស៊កដានី ដែលសម្លាប់ទ័ពរបស់ខ្លួន៣នាក់ហើយ ដោយនោះគឺជាកងជីវពលគាំទ្រដោយអ៊ីរ៉ង់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការអះអាងពីអ្នកនាំពាក្យក្រុមប្រឹក្សាសន្តិសុខជាតិលោក John Kirby, ចារកម្មអាមេរិកជឿថា ចលនាតស៊ូឥស្លាម មានមូលដ្ឋានក្នុងប្រទេសអ៊ីរ៉ាក់ គឺជាក្រុមទទួលខុសត្រូវចំពោះការវាយប្រហារកាលពីចុងសប្តាហ៍លើបន្ទាយអាមេរិក ដែលក៏បណ្តាលឲ្យទ័ព៤០នាក់ រងរបួសផងដែរ។

ទោះបីជាយ៉ាងណាក៏ដោយ ក្រុមឆ័ត្រនេះ ក៏ចេញមុខទទួលខុសត្រូវរួចទៅហើយដែរ មុនការប្រកាសជាផ្លូវការពីសំណាក់សហរដ្ឋអាមេរិក។

ទន្ទឹមនោះ លោក Kirby ក៏បានព្រមានខ្លាំងៗទៅក្រុមនោះផងដែរថា “កុំគិតថា អ្នកមិនឃើញអ្វីក្នុងរយៈពេល៤៨ម៉ោងមកនេះ មានន័យថា នឹងមិនមានអ្វីកើតឡើងនោះ។ រឿងដំបូងដែលអ្នកឃើញ នឹងមិនមែនជារឿងចុងក្រោយទេ”។

មុននេះដែរ លោកប្រធានាធិបតី ចូ បៃដិន បានប្រកាសសម្រេចចិត្តសងសឹក ប៉ុន្តែថា លោកមិនចង់មានសង្គ្រាមធំ នៅមជ្ឈិមបូព៌ាឡើយ ព្រោះតំបន់នេះ កំពុងអស្ថិរភាពដោយជម្លោះអ៊ីស្រាអែល-ហ្គាហ្សារួចទៅហើយ។

យ៉ាងណាក្តី អ៊ីរ៉ង់ បានចេញមុខបដិសេធម្តងហើយម្តងទៀតថា ខ្លួនមិនជាប់ពាក់ព័ន្ធអ្វីទេ ជាមួយការវាយប្រហារនៅមូលដ្ឋាន Tower 22 នោះ ប៉ុន្តែទីក្រុងតេហេរ៉ង់គំរាមថា ពួកគេនឹងឆ្លើយតបចាស់ដៃទៅវិញ បើមានការវាយប្រហារណាមួយលើទឹកដីរបស់ខ្លួន ឬជនជាតិក៏ដូចជាទីតាំងរបស់ខ្លួននៅក្រៅប្រទេស។

សារព័ត៌មាន IRNA បានដកស្រង់សម្តីប្រេសិតអ៊ីរ៉ង់ប្រចាំអង្គការសហប្រជាជាតិ លោក Amir Saeid Iravani ដែលនិយាយថា វាគឺជាគោលនយោបាយរបស់អ៊ីរ៉ង់ ដែលត្រូវឆ្លើយតបខ្លាំងក្លាចំពោះសត្រូវ ក្នុងករណីមានការវាយប្រហារណាមួយ៕

អត្ថបទ៖ សុខ សុវណ្ណ

ចុចអាន៖ អ៊ីរ៉ង់ គំរាមឆ្លើយតបចាស់ដៃទៅវិញ បើអាមេរិក ហ៊ានធ្វើអ្វី ប៉ះពាល់ខ្លួន