ព័ត៌មានអន្ដរជាតិ

លោក ពូទីន ឆ្លៀតឱកាសក្នុងទិវាជ័យជម្នះ បង្អួតសមត្ថភាពនុយក្លេអ៊ែរ សម្លុតទៅលោកខាងលិច

បានផុស

១ សប្តាហ៍ មុន

នៅ

ថ្ងៃសុក្រ ១០ ឧសភា ២០២៤

ដោយ

ឆ្លៀតក្នុងឱកាសនៃការប្រារព្ធទិវាជ័យជម្នះនៅក្នុងទីក្រុងមូស្គូ លោកប្រធានាធិបតីរុស្ស៊ី វ្ល៉ាឌីមៀរ ពូទីន បានប្រើប្រាស់វោហារសាស្ត្រសង្កត់ធ្ងន់លើសមត្ថភាពនុយក្លេអ៊ែររបស់ខ្លួន ខណៈក្រុមអ្នកវិភាគមើលឃើញថា នេះជាទង្វើសម្លុតគំរាមជាក់ស្ដែងទៅបណ្ដាប្រទេសលោកខាងលិចដែលបាននិងកំពុងឈ្មុសឈ្មុលផ្ដល់ជំនួយយោធាដល់អ៊ុយក្រែន ។ នេះបើយោងតាមការចេញផ្សាយដោយទីភ្នាក់ងារព័ត៌មាន TASS កាលពីថ្ងៃទី៩ ខែឧសភាកន្លងទៅ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រុស្ស៊ីបានប្រារព្ធទិវាជ័យជម្នះលើក ៧៩ កាលពីថ្ងៃព្រហស្បតិ៍ ពោលចាប់តាំងពីអតីតសហភាពសូវៀតកម្ចាត់ពួកណាស៊ីនៅក្នុងប្រទេសអាល្លឺម៉ង់កាលពីឆ្នាំ ១៩៤៥ ខណៈនៅក្នុងខួបនោះទៀតសោត លោក ពូទីន ក៏បានបញ្ជាក់ហើយបញ្ជាក់ទៀតថា លោកនឹងមិនអនុញ្ញាតឲ្យនរណាម្នាក់មកសម្លុតគំរាម ឬមកប៉ះរុស្ស៊ីបាននោះឡើយ ហើយអ្នកចម្បាំងរុស្ស៊ីក៏ត្រៀមចិត្តត្រៀមកាយរួចជាស្រេចផងដែរក្នុងប្រយុទ្ធការពារមាតុប្រទេសរបស់ខ្លួន ។

ចំណែកអ្វីដែលក្រុមអ្នកវិភាគចាត់ទុកថា វោហារសាសព្ទរបស់លោក ពូទីន ជាការសម្លុតគំរាមទៅប្រទេសលោកខាងលិចនោះក៏ដោយសារតែសព្វាវុធដែលដាក់តាំងបង្អួតនៅក្នុងក្បួនដង្ហែយោធានោះ រួមមានទាំងអាវុធទំនើបៗដែលកងកម្លាំងរុស្ស៊ីប្រើក្នុងប្រទេសអ៊ុយក្រែន ដូចជាមីស៊ីលផ្លោងរយៈចម្ងាយខ្លី Iskander ដែលអាចផ្ទុកក្បាលគ្រាប់នុយក្លេអ៊ែរជាដើម ។

ស្របពេលជាមួយគ្នានេះ ការលើកឡើងរបស់លោក ពូទីន ក៏កើតមានឡើង បន្ទាប់ពីបណ្ដាប្រទេសដែលជាសមាជិកអង្គការណាតូ ក៏ដូចជារដ្ឋបាល់ទិកជាច្រើនប្រកាសបញ្ជូនកងទ័ពចូលមកកាន់ទឹកដីនៃប្រទេសអ៊ុយក្រែន ក៏ដូចជាការប្ដេជ្ញាការពារទឹកដីនៃសម្ព័ន្ធភាពយោធាមួយនេះមិនឲ្យបាត់សូម្បីប៉ុនសរសៃសក់ ។

ជាក់ស្ដែង កាលពីខែកុម្ភៈកន្លងទៅ លោកប្រធានាធិបតីបារាំង Emmanuel Macron បានដុតបញ្ឆេះស្ថានការណ៍ឲ្យកាន់តែភាពវឹកវរ ពាក់ព័ន្ធនឹងវោហារសាស័ព្ទរបស់លោកដែលនៅតែក្រាញននៀលពីការដាក់ពង្រាយអ្នកចម្បាំងជើងគោកទៅកាន់ប្រទេសអ៊ុយក្រែន ខណៈអធិការបតីអាល្លឺម៉ង់លោក Olaf Scholz បានព្រមានផងដែរថា អាល្លឺម៉ង់នឹងការពារទឹកដីអង្គការណាតូមិនឲ្យបាត់បង់សូម្បីមួយសង់ទីម៉ែត្រក្រឡាទៅឲ្យខាងរុស្ស៊ីនោះឡើយ ។

គួរបញ្ជាក់ថា ការសង្គ្រឺតធ្មេញដាក់គ្នារវាងរុស្ស៊ីជាមួយប្លុកយោធានៅអឺរ៉ុបខាងកើត និងតំបន់បាល់ទិកដែលមានអាមេរិកជាបងធំនៅពីក្រោយខ្នង ផ្ទុះមានឡើង បន្ទាប់ពីការពង្រីកខ្លួនរបស់ណាតូចូលទៅកៀកៗទឹកដីនៃប្រទេសអ៊ុយក្រែន ជាពិសេសប្រទេសអឺរ៉ុបដូចជា អាល្លឺម៉ង់ជាដើមបានដាក់ពង្រាយទ័ពទៅប្រទេសលីទុយអានី និងប៉ូឡូញដែលសុទ្ធសឹងតែជាប្រទេសនៅជាប់មាត់ទ្វាររុស្ស៊ី ៕