អាមេរិក ប្រកាសផ្ដល់កញ្ចប់ជំនួយយោធាបន្ថែម ៤០០ លានដុល្លារទៀតដល់ អ៊ុយក្រែន

សហរដ្ឋ​អាមេរិកកាលពីថ្ងៃសុក្រ​បាន​ប្រកាសផ្ដល់កញ្ចប់​ជំនួយ​យោធា​ថ្មី​ចំនួន ៤០០ លាន​ដុល្លារ​បន្ថែមទៀតដល់​អ៊ុយក្រែន ។ នេះបើយោងតាមការចេញផ្សាយរបស់សារព័ត៌មាន CNN នៅថ្ងៃទី​១០ ខែឧសភាកន្លងទៅ ។

កញ្ចប់នោះរួមមានអាវុធដែលអ៊ុយក្រែនបានស្នើសុំ ដូចជាប្រព័ន្ធមីស៊ីល Patriot, ប្រព័ន្ធខែលការពារដែនអាកាស HIMARS, គ្រាប់រំសេវ, មីស៊ីល Stinger, គ្រាប់កាំភ្លើងធំ ១៥៥ មិល្លីម៉ែត្រ, យានប្រយុទ្ធ Bradley បួករួមនឹងឧបករណ៍មួយចំនួនទៀតផងដែរ ។

សេចក្តីប្រកាសនេះគឺជាកញ្ចប់ថវិការទី ២ ហើយ ចាប់តាំងពីលោកប្រធានាធិបតី Joe Biden បានចុះហត្ថលេខាលើការផ្ដល់ជំនួយសព្វាវុធដល់អ៊ុយក្រែនក្នុងទំហំទឹកប្រាក់ ៦០ ពាន់លានដុល្លារ ខណៈរដ្ឋមន្ត្រីការបរទេសលោក Antony Blinken បាននិយាយថា សហរដ្ឋអាមេរិក និងសម្ព័ន្ធអន្តរជាតិនឹងបន្តឈរជាមួយអ៊ុយក្រែនក្នុងការការពារប្រទេសមួយនេះ ។

គួរបញ្ជាក់ថា សង្គ្រាមរុស្ស៊ី-អ៊ុយក្រែននៅតែអូសបន្លាយពេល ហើយរុស្ស៊ីកំពុងស្វែងរកការកេងចំណេញពីពេលវេលាដ៏យឺតយ៉ាវនៃការផ្ដល់អាវុធឲ្យទីក្រុងកៀវ និងបង្កើនការវាយប្រហារលើអ៊ុយក្រែនជាដើម ខណៈដែលសភាអាមេរិកនៅតែពិភាក្សាអំពីច្បាប់ក្នុងការផ្ដល់ជំនួយដល់អ៊ុយក្រែនបន្ថែមផងដែរ ៕

អត្ថបទ៖ ប៊ុន សុភាព