ព័ត៌មានអន្ដរជាតិ

WHO ប្រកាសរកជំនួយ ១១,១ពាន់លានដុល្លារ សម្រាប់ប្រតិបត្តិការ៤ឆ្នាំខាងមុខ

បានផុស

២ years មុន

នៅ

ថ្ងៃពុធ ២៩ ឧសភា ២០២៤

ដោយ

Chheang

“Investment Case” គឺជាគ្រោងការណ៍វិនិយោគមួយរបស់អង្គការសុខភាពពិភពលោក (WHO) ដើម្បីកៀរគររកនូវកញ្ចប់ជំនួយក្នុងទំហំទឹកប្រាក់ ១១,១ពាន់លានដុល្លារ សម្រាប់បន្តប្រតិបត្តិការនារយៈពេល៤ឆ្នាំខាងមុខទៀត ដែលបង្កើនសេវាសុខភាពឲ្យបានដល់មនុស្សជាង ១៥០លាននាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

WHO បានប្រកាសថា គម្រោងវិនិយោគនេះ មិនតែសំដៅតែលើហិរញ្ញវត្ថុមួយមុខនោះទេ គឺជាប់ទាក់ទងនឹងយុទ្ធសាស្ត្រសុខភាពសកល ក្នុងគោលបំណងជួយសង្គ្រោះជីវិតមនុស្ស៤០លាននាក់ ព្រមទាំងការធ្វើឲ្យប្រសើរឡើងនូវសុខភាពមនុស្ស៦ពាន់លាននាក់នៅពាសពេញពិភពលោក។

ស្ថិតនៅក្នុងសន្និបាតសុខភាពពិភពលោកនៅទីក្រុងហ្សឺណែវ, អង្គការ WHO បានរៀបរាប់ថា ខ្លួនបានទទួលការគាំទ្រ និងការប្ដេជ្ញាចិត្តផ្ដល់មូលនិធិពីប្រទេសមួយចំនួន ក៏ដូចជាសហភាពអឺរ៉ុប ដែលបង្ហាញពីផ្នត់គំនិតផ្តួចផ្ដើមដ៏មានសារៈសំខាន់ជាសកល។ លោក Tedros Adhanom Ghereyesus អគ្គនាយក WHO បាននិយាយថា “ច្រើនជាងពាក់កណ្ដាលនៃប្រជាជនលើពិភពលោក មិនទទួលបានពេញលេញនូវសេវាកម្មសុខភាពចាំបាច់មួយ ឬច្រើននោះទេ ហើយមនុស្ស២ពាន់លាននាក់ប្រឈមនឹងការលំបាកផ្នែកហិរញ្ញវត្ថុ ដោយសារតែការចំណាយសុខភាពដោយខ្លួនឯង”។

លោកអគ្គនាយក ថា ការបន្តជួយ WHO ឲ្យមានស្ថិរភាពហិរញ្ញវត្ថុ មានភាពចាំបាច់សម្រាប់ពិភពលោកទាំងមូល ដើម្បីដោះស្រាយការគំរាមកំហែងលើបញ្ហាសុខភាពជាច្រើន។

លោក Tedros Adhanom Ghereyesus អគ្គនាយក WHO (រូបភាព៖ Reuters)

WHO បានបញ្ជាក់ថា បច្ចុប្បន្ន ប្រាក់ជំនួយដែលទទួលបាន មានចំនួន ៤ពាន់លានដុល្លារហើយ នៅខ្វះ ៧,១ពាន់លានដុល្លារ ដែលទាមទារឲ្យមានការបរិច្ចាគស្ម័គ្រចិត្តបន្ថែមទៀត។

សូមបញ្ជាក់ថា សម្រាប់យុទ្ធសាស្ត្រឆ្នាំ២០២៥-២០២៨ របស់អង្គការ WHO មានដូចជា ការជំរុញថាមពលសឡាឲ្យមន្ទីរសុខភាពចំនួន ១ម៉ឺនកន្លែងបានប្រើប្រាស់ពេញលេញ, ការគាំទ្រប្រទេសចំនួន៥៥ នៅក្នុងការអប់រំ ព្រមទាំងជួលបុគ្គលិកសេវាកម្មសុខភាពចំនួន ៣,២លាននាក់, ការបង្កើតចំនួនវ៉ាក់សាំងដល់បណ្ដាប្រទេសដែលត្រូវការចាំបាច់, ការផ្ដល់សេវាកម្មសុខភាពឲ្យមនុស្ស ១៥០លាននាក់ដល់ប្រទេសចំនួន ៣០, និងការជួយដល់ប្រទេសចំនួន ៨៤ ឲ្យឈានដល់គោលដៅលុបបំបាត់ជំងឺគ្រុនចាញ់ ការឆ្លងមេរោគអេដស៍ ក៏ដូចជាជំងឺឆ្លងនានាទៀត៕