ព័ត៌មានអន្ដរជាតិ

លោក ហ្សេលេនស្គី ថា កំពុងរៀបចំគម្រោងបញ្ចប់សង្គ្រាមជាមួយរុស្ស៊ីហើយ

បានផុស

២ years មុន

នៅ

ថ្ងៃសៅរ៍ ២៩ មិថុនា ២០២៤

ដោយ

Chheang

លោក ហ្សេលេនស្គី បានប្រកាសនៅក្នុងសន្និសទីកាសែតមួយកាលពីថ្ងៃទី២៨ ខែមិថុនា ឆ្នាំ២០២៤ ថា លោកកំពុងរៀបចំគម្រោងសំខាន់មួយ ដែលត្រៀមនឹងបិទបញ្ចប់សង្គ្រាមជាមួយប្រទេសរុស្ស៊ី។

មេដឹកនាំអ៊ុយក្រែន បានបញ្ជាក់ថា គម្រោងបញ្ចប់សង្គ្រាមនេះ នឹងមានការគាំទ្រភាគច្រើនពីពិភពលោក បន្ទាប់ពីការចូលរួមក្នុងកិច្ចប្រជុំសន្ដិភាពនៅស្វីស កាលពីពាក់កណ្ដាលខែមិថុនាកន្លងទៅ។ លោក បន្តថា អ៊ុយក្រែនគ្មានពេលច្រើនទៀតទេ ខណៈចំនួនទាហាន និងជនស៊ីវិល ដែលបាត់បង់ជីវិត ចេះតែកើនឡើងឥតឈប់ឈរ។ យ៉ាងណាមិញ លោកមិនទាន់បញ្ជាក់លម្អិតពីគម្រោងនោះថាជាអ្វីឲ្យប្រាកដនោះឡើយ តែលោក ហ្សេលេនស្គី បានប្រាប់ថា វានឹងត្រូវប្រកាសឲ្យដឹងនាប៉ុន្មានខែខាងមុខ។

គួររំឭកថា អ៊ុយក្រែន បានរៀបចំកិច្ចប្រជុំសន្ដិភាព ក្នុងប្រទេសស្វីស កាលពីថ្ងៃទី១៥ ដល់ថ្ងៃទី១៦ ខែមិថុនា ឆ្នាំ២០២៤ ដើម្បីកៀរគរការគាំទ្រពីអន្តរជាតិទាមទារឲ្យរុស្ស៊ីដកកងទ័ពចេញទាំងស្រុងពីអ៊ុយក្រែន ក្នុងការពន្លត់ភ្លើងសង្គ្រាម។ ប្រទេសនិងអង្គការជាង១៦០ ត្រូវបានអញ្ជើញឲ្យចូលរួម ប៉ុន្តែជិតពាក់កណ្តាលបានបដិសេធ ដោយសារតែអវត្តមានរុស្ស៊ី។ សេចក្តីថ្លែងការណ៍ចុងក្រោយនៃកិច្ចប្រជុំសន្តិភាព មិនទាន់ផ្សព្វផ្សាយជាសាធារណៈនៅឡើយទេ ប៉ុន្តែបើយោងតាមទីភ្នាក់ងារសារព័ត៌មាន Reuters ដោយលើកឡើងពីសេចក្តីព្រាងកាលពីថ្ងៃទី១៣ខែមិថុនា, សេចក្តីថ្លែងការណ៍នេះ គឺស្តីបន្ទោសរុស្ស៊ី ចំពោះសង្រ្គាមប្រឆាំងអ៊ុយក្រែន ដោយចោទប្រកាន់ថា ទីក្រុងមូស្គូ បានបង្កឲ្យមានការឈឺចាប់ក្រៃលែង និងបង្កមហន្តរាយចំពោះមនុស្សជាតិ ក៏ដូចជាបង្កើតហានិភ័យនិងវិបត្តិ បង្កផលប៉ះពាល់ជាសកល។

៤ថ្ងៃបន្ទាប់ពីកិច្ចប្រជុំសន្ដិភាពអ៊ុយក្រែន លោក វ៉ា្លឌឺមៀរ ពូទីន បានប្រកាសថា រដ្ឋាភិបាលរបស់លោកបានត្រៀមខ្លួនរួចរាល់ហើយសម្រាប់កិច្ចចរចាសន្ដិភាពជាមួយអ៊ុយក្រែន ដែលការចរចានេះអាចធ្វើបានភ្លាមៗពេលណាក៏បាន នៅទីកន្លែងណាក៏បាន។ មេដឹកនាំរុស្ស៊ីវ័យ៧១ឆ្នាំ បាននិយាយថា គំនិតផ្ដួចផ្ដើមសន្តិភាពរបស់រុស្ស៊ីជាមួយអ៊ុយក្រែន ទំនងជាអាចមានការជំទាស់ពីលោកខាងលិច។ លោក បន្តថា រាល់សំណើរបស់រុស្ស៊ី តែងតែត្រូវគេហៅថាជារឿងដែលមិនប្រាកដប្រជា ខណៈដែលគ្មាននរណាម្នាក់រិះគន់ “ឱសានវាទ” របស់អ៊ុយក្រែន ទាល់តែសោះ ចំពោះលក្ខខណ្ឌដែលទីក្រុងមូស្គូមិនអាចទទួលយកបានដូចគ្នា។ លោក ពូទីន បានបញ្ជាក់ទៀតថា ប្រសិនបើពិភពលោកចង់បញ្ចប់សង្គ្រាមមែន នោះក្រុមអ្នកនយោបាយនឹងពិចារណាទៅលើសំណើរបស់រុស្ស៊ីមិនខាន។

ចំណុច១ដែលលោក ពូទីន បានសង្កត់ធ្ងន់នោះគឺថា ប្រសិនបើអ៊ុយក្រែននៅតែទាមទារឲ្យរុស្ស៊ីដកទ័ពចេញ មុនចាប់ផ្ដើមកិច្ចចរចាសន្ដិភាព នោះវានឹងមិនអាចទៅរួចនោះឡើយ។ មួយវិញទៀត លោកនិយាយថា នៅឆ្នាំ២០២៥ខាងមុខ លោក ហេ្សលេនស្គី គួរតែត្រូវលោកខាងលិចផ្លាស់ប្ដូរចេញកុំឲ្យនៅដឹកនាំអ៊ុយក្រែនបន្តទៅទៀត៕

ដោយ៖ ឈាង