លោក ហ្សេលេនស្គី ថា ពិភពលោក​មិន​អាច​រង់ចាំ​ទាល់តែ​អាមេរិក​បោះឆ្នោត ទើប​កម្ចាត់ ពូទីន នោះ​ទេ

ប្រធានាធិបតីអ៊ុយក្រែន បាននិយាយ​​ថា វិធានការយ៉ាងម៉ឺងម៉ាត់​ត្រូវ​តែ​ធ្វើ​ឡើង មុនពេលការបោះឆ្នោតប្រធានាធិបតី​សហរដ្ឋ​អាមេរិកក្នុងខែវិច្ឆិកាខាង​មុខ ដើម្បីទប់ទល់ការវាយលុករបស់រុស្ស៊ីប្រឆាំងនឹងក្រុង​កៀវ។ លោក ហ្សេលេនស្គី បាន​ថ្លែង​ដូច្នេះ​នៅ​ក្នុង​សុន្ទរកថាមួយក្រៅកិច្ចប្រជុំកំពូលរបស់អង្គការណាតូ កាល​ពី​ថ្ងៃ​​ទី​៩ ខែ​កក្កដា ដើម្បីជំរុញឲ្យ​មានការគាំទ្រកាន់តែខ្លាំង​ចំពោះ​អ៊ុយក្រែន​​ ជុំវិញ​ក្ដី​បារម្ភ​ពាក់ព័ន្ធ​នឹង​ភាព​ច្របូកច្របល់នៅ​ក្នុង​នយោបាយអាមេរិក។

លោក ហ្សេលេនស្គី បាន​រៀបរាប់​ថា “វាដល់ពេលហើយ​ត្រូវ​ដើរចេញពីស្រមោល​ខ្មៅ​ ដើម្បី​​ធ្វើ​ការសម្រេចចិត្តដ៏រឹងមាំ ក្នុង​ការ​បញ្ចេញ​សកម្មភាព និងមិនរង់ចាំដល់ខែវិច្ឆិកា ឬខែផ្សេងទៀតដើម្បី​ធ្វើ​សកម្មភាព​នោះ​​ឡើយ។ យើងត្រូវតែរឹងមាំ និងប្រកាន់​ខ្ជាប់​ទាំង​អស់គ្នា”។

លោក បានបន្ថែមថា ប្រធានាធិបតីសហរដ្ឋអាមេរិក ត្រូវតែ​មាន​​ភាព​ប្រកាន់​ខ្ជាប់​​ក្នុងការការពារលទ្ធិប្រជាធិបតេយ្យ ប្រឆាំង​នឹង​ប្រធានាធិបតីរុស្ស៊ី លោក វ្ល៉ាឌីមៀរ ពូទីន និង​​សម្ព័ន្ធមិត្ត​របស់​លោក។ ការ​លើក​ឡើង​របស់​លោក ហ្សេលេនស្គី ត្រូវ​គេ​ដឹង​ថា ជា​ការ​ផ្ញើ​សារ​​ឲ្យ​​ទៅ​លោក ចូ បៃដិន និង​លោក ដូណាល់ ត្រាំ ដែល​ជា​បេក្ខភាព​​ប្រជែង​តំណែង​ប្រធានាធិបតី​អាមេរិក នា​ពេល​ឆាប់ៗ​ខាង​មុខ។

មេ​ដឹក​នាំ​​អ៊ុយក្រែន បាន​សង្កត់​ធ្ងន់​ថា ប្រសិន​បើ​​​​​លោក បៃដិន ចាញ់​ឆ្នោត​ លោក​​សង្ឃឹម​ថា លោក ត្រាំ នឹង​នៅ​តែ​បន្ត​គោល​នយោបាយ​​គាំទ្រ​​រដ្ឋាភិបាល​ក្រុង​កៀវ​​ដដែល​ទៀត។ លោក ហ្សេលេនស្គី ថា “ខ្ញុំ​សង្ឃឹម​​ សហរដ្ឋ​អាមេរិក​នឹង​មិន​ចាកចេញ​ពី​អង្គការ​ណាតូ​ឡើយ។ បើ​មិន​ដូច្នោះ ពិភពលោក​នឹង​ត្រូវ​បាត់បង់​ប្រទេស​ជា​ច្រើន រួ​ម​ទាំង​អាមេរិក​​ខ្លួន​ឯង​ផ្ទាល់”។

សូម​បញ្ជាក់​ថា នៅ​ក្នុង​កិច្ច​ប្រជុំ​ណាតូ កាល​ពី​ថ្ងៃអង្គារទី៩ ខែកក្កដា ឆ្នាំ២០២៤ ប្រធានាធិបតិអាមេរិកលោក ចូ បៃដិន បានប្រកាសផ្តល់ប្រព័ន្ធការពារដែនអាកាសថ្មី ៥ប្រភេទ ទៅឲ្យអ៊ុយក្រែន។ សេចក្តីប្រកាសផ្តល់ខែលការពារនេះ ធ្វើ​ឡើងត្រឹម១ថ្ងៃប៉ុណ្ណោះ បន្ទាប់ពីរុស្ស៊ី បើកការវាយប្រហារដោយមីស៊ីលយ៉ាងសាហាវ ទៅលើមន្ទីរពេទ្យកុមារនិងគោលដៅស៊ីវិលផ្សេងទៀតនៅក្នុងប្រទេសអ៊ុយក្រែន៕

ដោយ៖ ឈាង

ចុច​អាន៖ បើកកិច្ចប្រជុំណាតូ, លោក បៃដិន ប្រ​កាសផ្តល់ខែលការពារអាកាសថ្មី ឲ្យអ៊ុយក្រែន