តៃវ៉ាន់ ​តាម​ដាន​សកម្មភាព​យោធា​របស់​ចិន ខណៈស្ថានការណ៍ កាន់តែឡើងកម្តៅ

តៃវ៉ាន់ថា ខ្លួនកំពុងឃ្លាំមើលយ៉ាងយកចិត្តទុកដាក់នូវសកម្មភាពយោធារបស់ចិន ខណៈស្ថានការណ៍កាន់តែក្តៅគគុកបន្ទាប់ពីមានយន្តហោះចម្បាំងកាន់តែច្រើន ចូលរួមសមយុទ្ធជាមួយនាវាដឹកយន្តហោះ Shandong នៅក្នុងសមយុទ្ធប៉ាស៊ីហ្វិក។ នេះបើយោងតាមការចេញផ្សាយរបស់ទីភ្នាក់ងារពត៌មាន Reuters នៅថ្ងៃព្រហស្បតិ៍ទី១១ខែកក្កដា។

រដ្ឋមន្ត្រីការពារជាតិតៃវ៉ាន់ បានឲ្យដឹងថា នាវាដឹកយន្តហោះ Shandong បានឆ្លងកាត់តំបន់ជិតប្រទេសហ្វីលីពីន ក្នុងដំណើរឆ្ពោះទៅកាន់សមយុទ្ធប៉ាស៊ីហ្វិក។ ក្នុងរយៈពេល ២៤ ម៉ោងចុងក្រោយ តៃវ៉ាន់បានប្រទះឃើញយន្តហោះយោធាចិនចំនួន ៦៦ គ្រឿងដែលកំពុងប្រតិបត្តិការនៅជុំវិញកោះនេះ ហើយក្នុងចំណោមនោះ មានយន្តហោះ ៣៩គ្រឿង បានឆ្លងកាត់ទៅភាគខាងត្បូង និងអាគ្នេយ៍នៃកោះតៃវ៉ាន់។

លើសពីនេះក្រសួងការពារជាតិតៃវ៉ាន់ក៏បានបញ្ចេញរូបភាពពីរសន្លឹក បង្ហាញពីយន្តហោះចម្បាំង J-16 និង យន្តហោះទម្លាក់គ្រាប់បែកមានសមត្ថភាពផ្ទុកនុយក្លេអ៊ែរធុន H-6 ផងដែរ ដែលតៃវ៉ាន់ទើបថតបានថ្មីៗ។

គួរបញ្ជាក់ថា ក្នុងរយៈពេល ៤ឆ្នាំចុងក្រោយនេះ តៃវ៉ាន់ បានត្អូញត្អែរមិនដាច់ពីមាត់ អំពីសកម្មភាពយោធារបស់ចិន ខណៈទីក្រុងប៉េកាំង ព្យាយាមដាក់សម្ពាធលើកោះនេះខ្លាំងបំផុត៕

អត្ថបទ៖ ប៊ុន សុភាព