មេដឹកនាំអឺរ៉ុប​៥០នាក់វាយតម្លៃ ត្រាំ នឹងប៉ះពាល់ដល់ទ្រព្យសម្បត្តិពួកគេ និងស្វែងរកជំហររួម​លើ​​​រុស្ស៊ី

មេដឹកនាំអឺរ៉ុបប្រហែល៥០​កាលពីថ្ងៃព្រហស្បតិ៍បានអំពាវនាវឱ្យមានជំហរការពារកាន់តែខ្លាំងនៅទូទាំងទ្វីប ដែលមិនត្រូវការការពឹងផ្អែកជាមូលដ្ឋានលើទីក្រុងវ៉ាស៊ីនតោនទៀតទេ ខណៈដែលពួកគេបានផ្តល់ការស្វាគមន៍យ៉ាងប្រុងប្រយ័ត្នចំពោះប្រធានាធិបតីជាប់ឆ្នោតថ្មីរបស់សហរដ្ឋអាមេរិកលោក ដូណាល់ ត្រាំ​។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី​០៨ខែវិច្ឆិកានេះ។

កិច្ចប្រជុំកំពូលសហគមន៍នយោបាយអឺរ៉ុបកាលពីថ្ងៃព្រហស្បតិ៍ក្នុងរដ្ឋធានី Budapest ប្រទេសហុងគ្រីបានវាយតម្លៃឡើងវិញនូវទំនាក់ទំនងឆ្លងមហាសមុទ្រអាត្លង់ទិកក្នុងក្តីសង្ឃឹមថាតំណែងប្រធានាធិបតីអាមេរិកទីពីររបស់លោក ត្រាំ នឹងជៀសវាងជម្លោះខុសពីរដ្ឋបាលដំបូងរបស់គាត់។

ម្តងហើយម្តងទៀត មេដឹកនាំអឺរ៉ុបបានបង្កើនការនិយាយថា កិច្ចខិតខំប្រឹងប្រែងការពារជាតិរបស់អឺរ៉ុបគួរតែត្រូវបានបង្កើន។ បន្ទាប់ពីកិច្ចប្រជុំកំពូលដែលលោកធ្វើជាម្ចាស់ផ្ទះ នាយករដ្ឋមន្ត្រីហុងគ្រី លោក Viktor Orbán បាននិយាយថា «មានកិច្ចព្រមព្រៀងដែលអឺរ៉ុបគួរតែទទួលខុសត្រូវបន្ថែមទៀតសម្រាប់ការធានាសន្តិភាព និងសុវត្ថិភាព។ ដើម្បី​និយាយ​ឲ្យ​កាន់តែ​ច្បាស់ យើង​មិនអាច​រង់ចាំ​ឲ្យ​ជនជាតិ​អាមេរិក​ការពារ​យើង​បាន​ឡើយ​»​។

គួររម្លឹកថាក្នុងអំឡុងពេលអាណត្តិដំបូង២០១៧-២០២១ លោក ត្រាំបានជំរុញឱ្យសម្ព័ន្ធមិត្តណាតូអឺរ៉ុបចំណាយប្រាក់បន្ថែមលើវិស័យការពារជាតិរហូតដល់ និងលើសពី ២% នៃផលិតផលក្នុងស្រុកសរុប និងឱ្យមានការពឹងផ្អែកតិចលើគម្របយោធារបស់សហរដ្ឋអាមេរិក។

ក្នុងអំឡុងពេលយុទ្ធនាការបោះឆ្នោតរបស់គាត់ លោក ត្រាំ បានព្រមានពីសង្គ្រាមពាណិជ្ជកម្មជាមួយអឺរ៉ុប ដល់ការដកខ្លួនចេញពីការប្តេជ្ញាចិត្តរបស់អង្គការណាតូ និងការផ្លាស់ប្តូរជាមូលដ្ឋាននៃការគាំទ្រដល់អ៊ុយក្រែនក្នុងសង្គ្រាមរបស់ខ្លួនជាមួយរុស្ស៊ី ខណៈបញ្ហាទាំងអស់ដែលអាចកើតមាន មានផលវិបាកសម្រាប់ប្រទេសនានានៅទូទាំងទ្វីបអឺរ៉ុប។

លើសពីនេះក្នុងអំឡុងយុទ្ធនាការឃោសនាបោះឆ្នោត លោក ត្រាំ បាននិយាយថា លោកអាចបញ្ចប់សង្គ្រាមនៅអ៊ុយក្រែន ដែលឥឡូវនេះឈានចូលឆ្នាំទី៣​ក្នុងរយៈពេលតែមួយថ្ងៃប៉ុណ្ណោះ។ អ៊ុយក្រែន និង​អ្នកគាំទ្រ​អឺរ៉ុប​ជាច្រើន​បារម្ភ​ថា នេះ​មាន​ន័យ​ថា​ជា​សន្តិភាព​មួយ​ក្នុង​លក្ខខណ្ឌ​អំណោយផល​ដល់​ប្រធានាធិបតី​រុស្ស៊ី វ្ល៉ាឌីមៀ ពូទីន និង​ពាក់ព័ន្ធ​នឹង​ការ​ចុះចាញ់​ទឹកដី។ សម្ព័ន្ធមិត្តអ៊ឺរ៉ុបនៅក្នុងអង្គការណាតូសង្ឃឹមថានឹងបញ្ចុះបញ្ចូលលោក ត្រាំ ថាប្រសិនបើគាត់ជួយចរចាសន្តិភាពណាមួយ វាគួរតែត្រូវបានធ្វើឡើងពីជំហររឹងមាំសម្រាប់ទាំងអ៊ុយក្រែន និងសហរដ្ឋអាមេរិក៕

អត្ថបទ៖ ប៊ុន​ សុភាព