ប្រធានាធិបតី​ស្តីទី​កូរ៉េ​ខាងត្បូង​ប្រឈម​​ការ​ចោទ​ប្រកាន់​​ដក​ហូត​ដំណែង​​​​ទៀត​

លោក Han Duck-soo ប្រឈម​ការ​បោះឆ្នោត​ទម្លាក់​​ពីតួនាទី​​ជា​ប្រមុខ​រដ្ឋ​​​ស្តី​ទី ​​ដោយសារ​តែ​លោក​រំលង​​ការ​ប្រកាស​​​ដាក់​ឲ្យ​ប្រើ​​​ច្បាប់​​​បង្កើត«​​​​​​​​ក្រុមស៊ើបអង្កេ​ត​ពិសេស» ដែល​​ស្នើបាន​ឡើងដោយ​រដ្ឋសភា​​​ដែលគ្រប់​ដណ្តប់​ដោយ​គណបក្ស​ប្រឆាំង​យ៉ាង​ច្រើនលើ​សលប់​កាល​ពី​សប្តាហ៍​មុន​ដើម្បី​ស៊ើបអង្កេត​លើ​លោក Yoon Suk Yeol និង​ភរិយា​​របស់​លោក​។

​ក្រោយ​​បរាជ័យ​ក្នុងការ​បោះឆ្នោតទម្លាក់​ ​​​ប្រធានាធិបតី​​ Yoon Suk Yeol ពី​អំណាច​ក្នុង​ជុំ​ដំបូង​កាល​ថ្ងៃទី​៧ខែ​ធ្នូ សភា​​​ជាតិកូរ៉េ​ខាងត្បូង​​បាន​បោះឆ្នោត​បង្កើត​​​ក្រុម​ស៊ើប​អង្កេត​​​​ពិសេស​មួយ​ដែល​មានសិទ្ធិ​អំណាច​ពិនិត្យ​​​​លើ​​ដំណើរការ​​​ប្រកាស​ច្បាប់​អាជ្ញាសឹក​​ដែល​ប្រកាស​​យ៉ាងតក់​ក្រហល់​ដោយ​ ​​​ប្រធានាធិបតី​​ Yoon Suk Yeol កាល​ថ្ងៃទី​៣​ខែ​​ធ្នូ។

​ទោះបី​ជាបែបណា ​ប្រធានាធិបតី​ស្តី​ទី ​លោក Han Duck-soo ​ ដែល​ឡើង​កាន់​អំណាច​បណ្តោះ​អាសន្ន​កាល​ថ្ងៃទី​១៤ខែ​ធ្នូ​ ​​​​​មិនបាន​គាំទ្រ​​ច្បាប់​​បង្កើត​ក្រុម​ស៊ើបអង្កេតពិសេស​នោះទេ។

គណបក្ស​ប្រជាធិបតេយ្យ​កូរ៉េ​ខាង​ត្បូង​បាន​និយាយ​នៅ​ថ្ងៃ​អង្គារ​នេះ​ថា ខ្លួន​នឹង​ជំរុញ​ដំណើរការ​ចោទប្រកាន់​​ព្យួរ​​ដំណែង​​​ប្រធានាធិបតី​ស្តីទី Han Duck-soo ដោយ​សារ​តែ​​ការ​បង្ហាញ​ពី​ការ​បដិសេធ​ចំពោះ​ការ​ទាមទារ​របស់​គណបក្ស​ប្រឆាំង​ក្នុង​​​ប្រកាស​ឲ្យ​ប្រើ​​​ច្បាប់​​​បង្កើត​​ក្រុមស៊ើប​អង្កេត​​ ដែល​សំដៅ​លើ​ប្រធានាធិបតី Yoon Suk Yeol និង​ស្ត្រី​ទីមួយ ហើយ​អំពាវនាវ​ឱ្យ​មាន​សភា«ការសម្របសម្រួល» លើបញ្ហាបច្ចុប្បន្ន។

លោក Park Chan-dae មេដឹកនាំ នៃគណបក្សប្រជាធិបតេយ្យបានចោទប្រកាន់លោក Han ពីឧបសគ្គក្នុងចេតនារក្សានូវអ្វីដែលក្រុមប្រឆាំងកំពុងកំណត់ថា ជាទង្វើនៃការបះបោរលើផ្នែករបស់ប្រធានាធិបតី Yoon Suk Yeol ។

គណបក្សប្រឆាំងដ៏សំខាន់បាននឹងកំពុងអំពាវនាវឱ្យមានច្បាប់ដែលនឹងអនុញ្ញាតឱ្យមានការស៊ើបអង្កេតពី​ក្រុមស៊ើបអង្កេត​ពិសេសលើការ​ចោទ​ប្រកាន់​ពី​«ការបះបោរ និងការចោទប្រកាន់អំពើពុករលួយ» ពាក់ព័ន្ធនឹងប្រធានាធិបតី Yoon Suk Yeol និងស្ត្រីទីមួយ Kim Keon-hee ​ក្នុង​អំឡុងពេល​កាន់​អំណាច​​អស់​រយៈពេល​ជាង​២ឆ្នាំ​។ លោក Yoon បានស្ថិតនៅក្រោមការស៊ើបអង្កេតព្រហ្មទណ្ឌចំពោះ «​​ការបះបោរ និងការរំលោភបំពានអំណាច» ទាក់ទងនឹងការបញ្ជារបស់គាត់ក្នុងអំឡុងពេលនៃការ​ដាក់​ច្បាប់អាជ្ញាសឹកថ្ងៃទី​កាល​ថ្ងៃទី​៣​​ខែធ្នូរបស់គាត់។

​សេចក្តីរាយការណ៍​របស់ Korea Herald បាន​ឲ្យដឹង​ថា កិច្ចប្រជុំគណៈរដ្ឋមន្ត្រីរបស់​ប្រធានាធិបតីស្តីទី Han Duck-soo ​នៅ​ថ្ងៃអង្គារនេះ​បានរំលងការពិនិត្យឡើងវិញលើអត្ថបទ​ច្បាប់​នោះ​ទាំងស្រុង ខណៈដែលប្រធានាធិបតីស្តីទីបានអំពាវនាវឱ្យមាន «វិធានការសម្របសម្រួល» ពីគណបក្សកាន់អំណាច និងគណបក្សប្រឆាំងជុំវិញបញ្ហានៃសេចក្តីព្រាងច្បាប់ និងការតែងតាំងចៅក្រមតុលាការធម្មនុញ្ញថ្មី៕​

ដោយ រ៉ាន់ រើយ​