ព័ត៌មានអន្ដរជាតិ

ថៃមានចំណាប់ខ្មាំង៨រូបនៅក្នុងដៃហាម៉ាស និងអំពាវនាវឲ្យដោះលែងក្រោមបទឈប់បាញ់នេះ

បានផុស

៣ សប្តាហ៍ មុន

នៅ

ថ្ងៃអាទិត្យ ១៩ មករា ២០២៥

ដោយ

រដ្ឋមន្ត្រីការបរទេសនៃព្រះរាជាណាចក្រថៃស្វាគមន៍កិច្ចព្រមព្រៀងឈប់បាញ់ដោះលែងចំណាប់ខ្មាំងដែលចូលជាធរមាននៅថ្ងៃរសៀលថ្ងៃទី១៩ខែមករានេះ និងអំពាវនាវឱ្យដោះលែងជនជាតិខ្លួនដែលឃុំខ្លួននៅហ្គាហ្សាប្រមាណ៨នាក់។

រដ្ឋមន្ត្រីការបរទេសលោក *Maris Sangiampongsa* ក្នុងអំឡុងពេលទស្សនកិច្ចនៅកម្ពុជា។ MFIAC។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសេចក្តីថ្លែងការណ៍មួយ ក្រសួងការបរទេសថៃស្វាគមន៍ចំពោះកិច្ចព្រមព្រៀងឈប់បាញ់ដោះលែងចំណាប់ខ្មាំងដែលជាការទន្ទឹងរង់ចាំមួយដ៏យូរ និងអំពាវនាវឱ្យមានការដោះលែងអ្នកទាំងអស់ដែលត្រូវបានឃុំខ្លួននៅក្នុងហ្គាហ្សា រួមទាំងជនជាតិថៃផងដែរ។

ក្រសួងនិយាយថា៖«ប្រទេសថៃស្វាគមន៍ចំពោះការប្រកាសបទឈប់បាញ់និងកិច្ចព្រមព្រៀងចំណាប់ខ្មាំងនៅហ្គាហ្សាស្ទ្រីប»។

សេចក្តីថ្លែងការណ៍បានសរសេរថា៖«ប្រទេសថៃសរសើរកាតា អេហ្ស៊ីប និងសហរដ្ឋអាមេរិក ចំពោះតួនាទីសំខាន់របស់ពួកគេ និងបន្តកិច្ចខិតខំប្រឹងប្រែងក្នុងការសម្រុះសម្រួលភាគីជម្លោះឆ្ពោះទៅរកការបញ្ចប់ដោយជោគជ័យនៃកិច្ចព្រមព្រៀង»។

ក្រសួងបាននិយាយថា៖«ប្រទេសថៃអំពាវនាវឱ្យភាគីទាំងអស់អនុវត្តកិច្ចព្រមព្រៀងនេះឱ្យបានពេញលេញ ក៏ដូចជាការដោះលែងជាបន្ទាន់នូវចំណាប់ខ្មាំងដែលនៅសេសសល់ទាំងអស់ រួមទាំងជនជាតិថៃផងដែរ»។

ជនជាតិថៃ៨នាក់ដែលត្រូវបានចាប់ជាចំណាប់ខ្មាំងពីអ៊ីស្រាអែលកាលពីថ្ងៃទី៧ខែតុលាឆ្នាំ២០២៣ នៅតែត្រូវបានឃុំខ្លួននៅហ្គាហ្សា។

ទោះបីយ៉ាងណា ការដោះលែងចំណាប់ខ្មាំងដែលពេញកម្លាំងនឹងមិនស្ថិតនៅក្នុងកិច្ចព្រមព្រៀងលើកនេះទេ ដោយសារតែចំណាប់ខ្មាំងដែលត្រូវដោះលែងលើកនេះចំនួន៣៣នាក់ជាថ្នូរការដោះលែងអ្នកទោសប៉ាឡេស្ទីនប្រមាណ២០០០នាក់។ ចំណាប់ខ្មាំងភាគច្រើនជាស្ត្រី កុមារ និងមនុស្សចាស់អាយុលើស៥០ឆ្នាំ។

មានការវិភាគថា ក្រុមហាម៉ាសនឹងដាក់ថ្លៃដ៏ខ្ពស់ជាថ្នូរនឹងការដោះលែងចំណាប់ខ្មាំងដែលសល់ជាង៥០នាក់ទៀត៕

ដោយ រ៉ាន់ រើយ