ព័ត៌មានអន្ដរជាតិ

ស្ងាត់ៗ! បទឈប់បាញ់មួយសម្រេចនៅមីយ៉ាន់ម៉ា ក្រោមការសម្របសម្រួលរបស់ចិន

បានផុស

៤ ខែ មុន

នៅ

ថ្ងៃអង្គារ ២១ មករា ២០២៥

ដោយ

យោធាមីយ៉ាន់ម៉ា និងកងទ័ពសម្ព័ន្ធភាពប្រជាធិបតេយ្យជាតិមីយ៉ាន់ម៉ា (MNDAA) បានចុះហត្ថលេខាលើកិច្ចព្រមព្រៀងផ្លូវការមួយសម្រាប់បទឈប់បាញ់ ដោយបញ្ឈប់ការប្រយុទ្ធគ្នានៅជិតព្រំដែននៃប្រទេសចិននិងមីយ៉ាន់ម៉ា។ នេះបើយោងតាមក្រសួងការបរទេសចិន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យក្រសួងការបរទេសចិន លោកស្រី Mao Ning បានឲ្យដឹងថា ភាគីទាំងពីរបានជួបពិភាក្សាគ្នានៅទីក្រុង Kunming ភាគនិរតីរបស់ប្រទេសចិន ជាទីប្រជុំដែលពួកគេបានថ្លែងអំណរគុណដល់ទីក្រុងប៉េកាំងចំពោះកិច្ចខិតខំប្រឹងប្រែងក្នុងការលើកកម្ពស់សន្តិភាព។

លោកស្រី បាននិយាយថា៖«ការធ្វើឱ្យស្ថានការណ៍នៅភាគខាងជើងនៃប្រទេសមីយ៉ាន់ម៉ាមានភាពស្ងប់ស្ងាត់ គឺជាផលប្រយោជន៍រួមរបស់ភាគីទាំងអស់ក្នុងប្រទេសមីយ៉ាន់ម៉ា និងប្រទេសទាំងអស់នៅក្នុងតំបន់ ហើយរួមចំណែកដល់សន្តិសុខ ស្ថិរភាព និងការអភិវឌ្ឍនៃតំបន់ព្រំដែនរវាងចិន និងមីយ៉ាន់ម៉ា»។

លោកស្រី បានបន្ថែមថា ប្រទេសចិននឹងបន្តជំរុញយ៉ាងសកម្មនូវសន្តិភាព និងការសន្ទនា ព្រមទាំងផ្តល់ការគាំទ្រ និងជំនួយដល់ដំណើរការសន្តិភាពនៅភាគខាងជើងប្រទេសមីយ៉ាន់ម៉ា។

សម្ព័ន្ធយោធាប្រដាប់អាវុធមីយ៉ាន់ម៉ា MNDAA គឺជាក្រុមប្រដាប់អាវុធជនជាតិភាគតិចមួយក្នុងចំណោមក្រុមប្រដាប់អាវុធជនជាតិភាគតិចជាច្រើនដែលកំពុងប្រយុទ្ធដើម្បីបណ្តេញយោធាចេញពីទឹកដីរបស់ពួកគេ។ ការប្រយុទ្ធនោះ វាជាផ្នែកមួយដែលហៅថា សម្ព័ន្ធបងប្អូនបី ជាមួយនឹងកងទ័ពរំដោះជាតិ Ta’ang និងកងទ័ព Arakan ដែលបានបើកការវាយលុកប្រឆាំងនឹងរបបយោធានៅចុងខែតុលា ឆ្នាំ២០២៣ ដណ្តើមយកទឹកដីជាច្រើននៅជិតព្រំដែនជាមួយប្រទេសចិន។ កាលពីខែកក្កដាឆ្នាំមុន ក្រុមសម្ព័ន្ធយោធានេះបានគ្រប់គ្រងមូលដ្ឋានយោធាសំខាន់មួយនៅជិតព្រំដែនចិនផងដែរ។

គួររម្លឹកថា រដ្ឋាភិបាលក្រុងប៉េកាំងពីមុនធ្លាប់បានចុះកិច្ចព្រមព្រៀងបទឈប់បាញ់នៅតំបន់ព្រំដែនភាគខាងជើងក្នុងខែមករាឆ្នាំ ២០២៤ ប៉ុន្តែកិច្ចព្រមព្រៀងនេះបានធ្លាក់ចុះប៉ុន្មានខែក្រោយមក។

ក្រុមអ្នកវិភាគបាននិយាយថា ប្រទេសចិនមានការព្រួយបារម្ភអំពីការរីកចម្រើននៃកងកម្លាំងប្រឆាំងរបបយោធា ដែលបានរុញច្រានយោធាចេញពីព្រំដែនដ៏សំខាន់ ហើយបានចាប់ផ្តើមធ្វើផ្លូវចូលឆ្ពោះទៅកាន់កណ្តាលទីក្រុង Mandalay។

ប្រទេសចិនបារម្ភថា ភាពវឹកវរនៅតាមបណ្តោយព្រំដែនប្រវែងជាង ២០០០ គីឡូម៉ែត្ររបស់ខ្លួនជាមួយប្រទេសមីយ៉ាន់ម៉ា នឹងធ្វើឱ្យប៉ះពាល់ដល់ការវិនិយោគ និងពាណិជ្ជកម្ម ខណៈចាប់តាំងពីយោធាបានដណ្តើមអំណាចពីរដ្ឋាភិបាលស៊ីវិលមីយ៉ាន់ម៉ាក្នុងខែកុម្ភៈ ឆ្នាំ២០២១ បានធ្វើឲ្យប្រទេសនេះធ្លាក់ក្នុងវិបត្តិមកដល់ពេលនេះ៕