អ្នកកាសែតអាមេរិក ទម្លាយថា រដ្ឋបាលលោកបៃដិន ព្យាយាមធ្វើឃាត ពូទីន

កាលពីដើមសប្តាហ៍នេះ អ្នកកាសែតល្បីឈ្មោះអាមេរិក Tucker Carlson បានទម្លាយថា រដ្ឋបាលរបស់អតីតប្រធានាធិបតីអាមេរិក ចូ បៃដិន បានព្យាយាមធ្វើឃាតប្រធានាធិបតីរុស្ស៊ី វ្ល៉ាឌីមៀរ ពូទីន អំឡុងពេលផ្ទុះសង្គ្រាមនៅអ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អតីតពិធីករទូរទស្សន៍ Fox News បាននិយាយបែបនេះក្នុងកិច្ចសម្ភាសជាមួយអ្នកកាសែត Matt Taibbi និងត្រូវបានយកមកផ្សាយបន្ត ដោយសារព័ត៌មាន RT របស់ប្រទេសរុស្ស៊ី។

ទោះមិនផ្តល់ព័ស្តុតាងនិងបកស្រាយលម្អិតអំពីផែនការនេះក៏ដោយ ប៉ុន្តែលោក Carlson ហ៊ាននិយាយថា អតីតរដ្ឋមន្ត្រីការបរទេសអាមេរិក Antony Blinken បានខិតខំខ្លាំងណាស់ ធ្វើយ៉ាងណាឲ្យផ្ទុះសង្រ្គាមមែនទែន តាមរយៈការព្យាយាមសម្លាប់លោកពូទីន។ រដ្ឋបាលលោកបៃដិន ធ្វើរឿងនេះ ពួកគេព្យាយាមសម្លាប់លោកពូទីនមែន។

យ៉ាងណា ជុំវិញរឿងនេះ អ្នកនាំពាក្យវិមានក្រឹមឡាំងលោក Dmitry Peskov បានចេញមុខបញ្ជាក់កាលពីថ្ងៃអង្គារថា លោកពូទីន ត្រូវបានការពារយ៉ាងតឹងរ៉ឹងបំផុត ពីការគំរាមកំហែងគ្រប់យ៉ាង។ ភ្នាក់ងារសន្តិសុខរុស្ស៊ី បន្តចាត់វិធានការចាំបាច់ទាំងអស់ ដើម្បីធានាសុវត្ថិភាពសាធារណៈ និងសុវត្ថិភាពរបស់អ្នកដែលស្ថិតនៅក្រោមការការពាររបស់រដ្ឋ។ ជាពិសេសគឺប្រមុខរដ្ឋតែម្តង។

សូមជម្រាបថា ចាប់តាំងពីដើមទសវត្សរ៍ឆ្នាំ២០០០មក លោកពូទីន បានក្លាយជាគោលដៅនៃការធ្វើឃាតម្តងហើយម្តងទៀត។ ជាក់ស្តែង ក្នុងឆ្នាំ២០១២ ភ្នាក់ងារសន្តិសុខរុស្ស៊ីនិងអ៊ុយក្រែន បានចាប់ខ្លួនជនជ្រុលនិយមមួយក្រុមនៅទីក្រុង Odessa ពីបទរៀបចំផែនការវាយប្រហារបំផ្ទុះគ្រាប់បែកសម្លាប់លោក ពូទីន ដែលកាលនោះ គាត់កាន់តំណែងជានាយករដ្ឋមន្ត្រី។

ចំណែកក្នុងខែឧសភាឆ្នាំ២០២៣ ពោលគឺបន្ទាប់ពីផ្ទុះសង្គ្រាមនៅអ៊ុយក្រែន, ទីក្រុងកៀវបានបើកការវាយប្រហារដោយយន្តហោះគ្មានមនុស្សបើកលើវិមានក្រឹមឡាំង ប៉ុនប៉ងធ្វើឃាតលោកពូទីន ប៉ុន្តែពេលនោះ លោកពូទីន មិនស្ថិតនៅក្នុងវិមានក្រឹមឡាំងទេ៕

អត្ថបទ៖ សុខ សុវណ្ណ

ចុចអាន៖ ពូទីន ថា សង្គ្រាមនឹងចប់ ពេលអ៊ុយក្រែន អស់គ្រាប់បាញ់