ព័ត៌មានអន្ដរជាតិ

យន្តហោះមួយគ្រឿង ធ្លាក់លើផ្លូវ រួចបុកជាមួយរថយន្តក្រុង នៅ ប្រេស៊ីល

បានផុស

៣ សប្តាហ៍ មុន

នៅ

ថ្ងៃសៅរ៍ ៨ កុម្ភៈ ២០២៥

ដោយ

យន្តហោះខ្នាតតូចមួយគ្រឿងបានធ្លាក់លើផ្លូវរួចទៅបុកជាមួយរថយន្តក្រុងក្នុងទីក្រុង Sao Paulo ភាគខាងត្បូងប្រទេសប្រេស៊ីល បណ្តាលឲ្យឆាបឆេះពេញផ្លូវ សម្លាប់មនុស្សចំនួន២នាក់។ នេះបើយោងតាមការចេញផ្សាយរបស់សារព័ត៌មាន CNN នៅថ្ងៃសៅរ៍ទី០៨ខែកុម្ភៈឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមប៉ូលិស ឧបទ្ទវហេតុនេះកើតឡើងនៅម៉ោងប្រហែល ៧ និង២០នាទីព្រឹក ម៉ោងក្នុងស្រុកនៅតាមបណ្តោយផ្លូវ Marques de Sao Vicente ក្នុងសង្កាត់ Barra Funda នៃទីក្រុង Sao Paulo។ មនុស្សពីរនាក់នៅលើយន្តហោះបានស្លាប់ ខណៈមនុស្ស៦នាក់ផ្សេងទៀតមានអ្នកជិះម៉ូតូ និងអ្នកជិះលើរថយន្តក្រុងបានរងរបួសដោយសារបំណែកយន្តហោះ។

យន្តហោះធុនតូចនេះជាយន្តហោះរបស់ក្រុមហ៊ុន King Air ដែលកំពុងធ្វើដំណើរហោះចេញពីអាកាសយានដ្ឋាន Campo de Marte ឆ្ពោះទៅកាន់ទីក្រុង Porto Alegre ក្នុងរដ្ឋ Rio Grande do Sul ប៉ុន្តែវាបានបាត់ការទាក់ទងប៉ុន្មាននាទីមុនពេលធ្លាក់។

អ្នកនាំពាក្យប៉ូលិសនៅទីក្រុងSao Paulo បានឲ្យដឹងថា ឆ្លើយតបទៅនឹងឧបទ្ទវហេតុនេះមានរថយន្តពន្លត់អគ្គិភ័យចំនួន ១៤ គ្រឿង និងអ្នកពន្លត់អគ្គិភ័យចំនួន ៣៨ នាក់បានចូលរួមក្នុងប្រតិបត្តិការជួយសង្គ្រោះ។

គួរបញ្ជាក់ថាមកដល់ពេលនេះអាជ្ញាធរបានបិទទីតាំងកើតហេតុនិងកំពុងបើកការស៊ើបអង្កេតរកមូលហេតុដែលបណ្ដាលឲ្យយន្តហោះនេះធ្លាក់៕